Iberreḥ-d ussan-a kan Uḥuddu Aɣerman (Protection Civile) n waɣir n Bgayet s kra n leḥsabat ɣef tuffɣiwin-is ɣer wannar deg useggas-a yekfan n 2016, akked userwes (taqrint) gar-as d sendilindi, neɣ 2015. Deg useggas-a yekfan ihi, n 2016, gren-d iman-nsen yirgazen n usellek azal n 33913 n tikkal. Gar wayen yexḍan ilel, akked teftist-nni deg unebdu s lqidar n 7932 n tuffɣiwin. Yettwajerred daɣen usiweḍ ɣer udawi s 12523 n tiwin, 1827 d azrab ɣer yiberdan ɣef ssebba n yisehwa. Rnu-as tid n usexsi n tmes s wazal n 2252. Iban dakken zaden ladɣa yisehwa (laksidat) n ubrid ma nwala i useggas n 2015. Imi deg useggas-n ḍran-d kan 1708 n yisehwa. Ma nemmeslay-d ɣef tẓegwa i tečča tmes, ahat ɛeddan 44 n yihikṭaren. Ɣer da, yewwi-d ad d-nesmekti belli, deg teɣzi n tegrest-a, ad yeg Uḥuddu Aɣerman n Bgayet deg waṭas n yiɣerbazen ilemmasen yiwet n tigawt n uḥesses ɣef yimahiyen n umunuksid n karbun i d-iteffɣen seg wallalen n useḥmu s wurrig (lgaz). Aqeddic-a, ad yili s tallelt n Tanmehla n usegmi (tterbiya).
M. K.