Akka, am yal tikkelt, tutlayt n tmaziɣt tettdeggir arraw-is s asenfali ama s timawit neɣ s tira. Taggara-agi, aḥric n tira yebda yettaɣ aẓar deg tmetti, ɣas akka ṭṭuqten fell-as yiɛewwiqen. Deg wussan-a yezrin, d Abdelnasser Rabia i d-yewwin adɣaɣ-is ula d netta I wakken ad yekki deg lebni n yiɣrem. Ilul deg taddart n Ccerfa i d-yezgan tama n usammar n Tubiret, Abdelnasser yessaweḍ ad d-iger s annar s yiwen n wammud n yisefra s wazal n 26. D adlis i d-yessufeɣ s ttawilat-is, yewwi-aɣ-d deg-s yiwet n terzeft anda yessukk tamuɣli-s ɣef waṭas n yiḥricen. D tayri, tin akken yeskenfen ulawen iwumi yefka azal meqqren deg yiḍrisen-is. Tikkelt ad t-naf yesḥassef, tikkelt yerfa neɣ ahat yegguma ad isemmeḥ. S yin, yezzi tamuɣli-s ɣer tudert n yal ass n umdan, anda ara naf “leɣrur n zman” yiwet n liḥala yettidir yal yiwen deg-neɣ. Dɣa, d yiwen n usefru i icudden ɣer waṭas n yisental iɣef d-yemmeslay umedyaz. Lezzayer, teṭṭef amkan deg wammud anda yesḥassef Rabia ɣef liḥala i tettidir, tin akken iwumi yessaram yal lxir. Am wakken daɣ yezzi ɣer tejmilin, tamezwarut yerra-tt i Lounis Ait Menguellet, anda yal afyir amenzu n tseddart yebda-t s yiwen seg tezlatin-is. D asefru i yessekfa s yiwet n teɣri mi d-yenna:” i lhedra-s kunwi cfu-t, yezga zeddig wawal-is.” Daɣ, yerra tajmilt-nniḍen i yemma-s d tyemmatin s umata, tidak yettaǧǧan lweḥc mi ara ɣabent. D acu kan, d lawan akka tura ad yili uwenneɛ deg tira n yidlisen i d-yettefɣen, imi nettwali tucḍiwin ggtent ɣas akka widak yessnen ad arun llan deg yal tama.
Smail. M