Seg wacḥal d akud, ama d iberdan neɣ d imeḍqan di berra, ččarayen d ahicur n yal taɣawsa, qrib ad ttɣummun akal. Iban dakken deg yakk timnaḍin, yettili-d uɣilif-a i itekksen tezdeg i twennaḍt-nneɣ. Maca, imi yal aɣbel yesɛa tifrat, yezmer umdan ad yeg leḥsab-is i waya: ad yessenqes xersum kra n ustehzi, ad yeḥbes aḍegger n tɣawsiwin ur yeḥwaǧ anda yufa kan. Annect-a, dɣa, ur t-ḍfiren ara yimezdaɣ n tuddar skud zgan qqaren ulac anda ara nessers agudu-nni, anagar abrid i asen-d-ibanen zun d asellak. Daymi teɛreḍ tɣiwant n Ayt Smaɛel, ad d-tefk ttawil i yimdanen seld mi d-tesres deg lweqt yezrin kra n tfesrin (poubelles) d timeqqranit, tefreq-itent deg yidigan seg wanda ttɛeddayen lɣaci s waṭas, am Iɣil Aɣezfan, Tigratin, Lmerj n Yiɣil, Tizwal, Taregragt d wiyaḍ. D tigawt yelhan i d-yekkan sɣur-sen, imi d yiwen n yiswi i yezdin, d asuter deg uɣref aqader n twennaḍt d temnaḍt. Segmi i d-mmuggent tfesrin-nni deg yiberdan, nezmer ad d-nini, ur yenqis ara uhicur akken ilaq. Aya, imi llan wid i igan ccɣel-is i yettwali d aɣan fell-as, llan wiyaḍ amzun d tewsex i asen-yehwan imi ugin ad ttekkin deg ucebbeḥ n taddart, d usebɛed n waṭṭanen. Ɛlaḥsab ayen i aɣ-d-yenna uselway wis sin n tɣiwant n Ayt Smaɛel, Mass Sadeq Rebbaɛi, ‘’Segmi ttwasersent tfesrin, rran tamawt i umgarad n lɛali i d-ibanen. Imi ur yezmir ḥedd ad yenker abaɣur-nsent skud jemmɛent ayen i ur nesliḥ. Rnu, mazal llant deg uxxam n tɣiwant tiyaḍ ttraǧunt aseqdec. Amedya ma rrẓent walbaɛḍ seg tid yersen deg yiberdan ad tili tin ara tt-ixelfen dindin. Ula d imezdaɣ ma yehwa-yasen, ma msefhamen gar-asen, zemren ad ssutren deg tɣiwant ad asen-d-ternu tifesrin-nni, ad rnun ad sneqsen agudu seg temnaḍt-nsen. Meḥsub ttawilat ur xussen ara, awi-d ukan ad yamed lebɣi n yiwet n tekti ɣef usizdeg n twennaḍt’’.
Kaisa Khalifi