T indaw (conjonctivite) , d tamsalmit neɣ d azzug yettḥazen timelli (conjonctive) yettḥaraben ɣef wallen n umdan. D aṭṭan yeṭṭuqten ama ɣer win meẓẓiyen neɣ ɣer win meqqṛen. Akken ibɣu ṭṭuqtent ccirat-is, ur yettḥaz ara iẓri. D acu kan imi ineṭṭeḍ seg umdan ɣer wayeḍ, isefk ɣef yal yiwen i t-yesɛan ad yerzu s amsujji ilaqen akken ad idawi iman-is si tama, ad isseḥbiber ɣef wiyaḍ si tama nniḍen.
D acu n ccirat yesɛa waṭṭan-a ?
Sumata, aṭṭan-a yettban-d s tezweɣ d uɣẓaẓ yettḥazen yiwet n tiṭ syin snat n wallen, d tirtaw id-itekken si takawt akked taɣart n waman iwṛaɣen d warseḍ deg yiḍ, daya ara imedlen allen tasebḥit mi ara d-yaki umdan seg yiḍes. Akken diɣ tettban-d s imeṭṭawen. Ineggura-ya čeṭṭinen tamuɣli labeɛda ma iḥuss umdan amzun yella yijdi deg wallen-is neɣ ahat tiṭ-is ad tcerreg si tegnit ɣer tayeḍ mi ara tt-yessembiwel.
Acu-tent sebbat n tindaw?
Tezmer ad tili sebba d abirus (virus) neɣ d tabaktirit (bactérie): ttḥazen ama yiwet n tiṭ ama snat n wallen. Abirus yettili d sebba n usiḥḥi yecban aman iwṛaɣen seg tiṭ, ma d tabaktirit teslalay-d arseḍ. Tindaw-a zemrent ad mlilent akked d ddeqs n lehlakat yecban aṭṭan n ubeḥri, aṭṭan n turin neɣ aqraḥ n tyersi. ṣṣenf-a ineṭṭeḍ aṭas gar medden, labaɛda win n tbaktirit ɣer yimeẓyanen. Sebba n tindaw tezmer ad tili diɣ d aḥerbal ( allergie) yettḥazen snat n wallen umbeɛd amlili n umdan akked tɣawsa ukkud yesɛa aḥerbal. Tindaw-a d sebba n uɣẓaẓ d wazzug n wallen ameqqran yettḥazen allen. Tineggura-ya ad neggint d imeṭṭawen war aḥbas. Llant diɣ kra n sebbat nniḍen yecban lewsex (aqeclaw) neɣ kra n ddwa iweɛren mi ara d-iṛuc tiṭ.
Milmi ilaq ad iruḥ umdan s amsujji ?
Isefk ɣef yal yiwen yesɛan tindaw ad yerzu s amsujji melba leɛḍil mkul mi ara iwali ccirat n tindaw labeɛda imi tneṭṭeḍ seg tiṭ ɣer tayeḍ, seg umdan ɣer wayeḍ ɣef teɣzi n snat n leddwaṛ si beddu n ccirat-nsent. Isefk diɣ ɣef win yettlusun tiɛeqqacin n wallen ( les lentilles de contact) ad tent-yekkes mkul mi ara t-id-yebdu waṭṭan-a akken ur itelli ara tawwurt i temsalmit iweɛṛen n wallen-is. Ilaq amdan ad iẓer dakken llan ddeqs n waṭṭanen bexlaf tindaw, zemren ad d-banen s tezweɣ n wallen, aqraḥ-nsent, anɣas n yiẓri, d ccirat ilaqen ad awint amdan s lɛeǧlan s amsujji n wallen akken ad inadi ɣef sebba .
Salima Dali