Tebḍa Rğawna ɣef snat n tuddar. Seg sbiṭar Sanatorium d asawen, d taddart n Lbour, anida yella uɣerbaz alemmas atmaten Malki d uɣerbaz amenzu, kra n tḥuna d leqhawi. Ad tkecmeḍ taddart tis snat Tacht, ad tafeḍ dinna lemqam n Sidi Beloua uɣur i d-ttasen aṭas n lɣaci. Am wakken yella, daɣen, uɣerbaz alemmas aqdim d uɣerbaz amenzu Bounar Belkacem , llant tḥuna yemxalafen, xas ma Rğawna d snat n tuddar ɛlayen , yesɛan tafulki , teqreb ɣer temdint, maca aṭas i d-yettasen n yimdanen ɣer dinna , yal wa sani i d-yettruḥu abeɛda imuḍan i iqesden sbiter n Balwa maca ad naf iberdan-nsen d udyiqen mliḥ , ɣzen yakk. Dɣa ddurt kammel, inehharen beddlen abrid, acku taddart n Lbour xedmen deg-s iqadusen n usufeɣ n waman, uɣalen ttasen-d seg taddart n Tacht. Bḍan ifurguten, llan wid yettawin kan ɣer sbiṭar akked Tacht, llan wiyaḍ, ttawin ɣer sbiṭar akked Lbour ayen i yestqelqen imuḍan d yixeddamen imi i d-yettili-d cwiṭ n leɛḍil. Ɛyan yinehharen seg ucetki akken ad d-yili useggem n yiberdan-agi, maca yiwen ur d-yerri i teɣri-nsen nnig n semmus n yiseggasen-aya, nutni d acetki ulac. Zgan inehharen d imenɣi anwa ara yeğğen wayeḍ akken ad iɛeddi. Msefhamen yimezdaɣ n Rğawna akken ad ɣelqen iberdan deg ussan i d-iteddun, maca ayagi ad d-yawi lemḍara ama i yimuḍan ama i yinelmaden ara yesɛeddin irmawen n ukradyur wis sin. Llan wid yebdan ass n ahad , llan wid yebdan ass n acer 26 deg furar, ɣef waya mi d-nesteqsa inehharen d yimezdaɣ n Rğawana, tiririt-nsen yiwet : «neɛya , neṣber, neṣber ulac d acu ixedmen iberdan, simmal ttkemmilen xessren, ar melmi ara nettrağu, tewweḍ tfidi s iɣes’’, i d-nnan
Z.A.Y.