Akken nuɣ tannumi, yal mi ara d-yawweḍ wass n 08 di meɣres, ttilint-d tmeɣriwin d yisaragen ɣef yizerfan n tmeṭṭut, yerkeḍ urgaz d tmetti s umata , maca ayɣer ur d-yettili ara wawal ɣef uzref n tmeṭṭut ɣer tmeṭṭut? Imi yella wanda tikwal, tameṭṭut trekkeḍ iman-is s yiman-is, amek? Anect-a, ibeddu-d deg wass n tlalit-is. ‘’Ar ass-a n wussan, mi ara d-terbu tmeṭṭut, terna ɣur-s teqcicit, mi ara nekcem s tlawin i wakken ad as-nessrebaḥ tarrawt, neqqaren-as: ‘’ lḥemdullah kan imi tmenɛeḍ. Ma yella d aqcic, neqqar-as: ad t-ig Rebbi d aɣezfan n laɛmer? rnu ttilin ilewlawen d tidet kan, d nkenti i yezwaren deg yiman-nteɣ” i aɣ-d- tenna Ǧuhra, yiwet n tmeṭṭut i nesteqsa. Ttbut, ad t-naf di cnawi n Newwara
Cfiɣ ɣef wasmi i d-luleɣ ,
Ur d-yelli wedriz felli.
Yid-wen mi d-mqabaleɣ,
Tezzim seg-i tamuɣli.
Tennam i yemma selleɣ :
Rebbi ad kem sebber a yelli.
ɣer waya , yella wanda mazal ar ass-a taneḥyaft daxel n twacult taqbaylit gar uqcic akked teqcict. Ad naf tayemmat d temɣert ttmalent aṭas ɣer warrac wala tiqcicin. Ula di tgella, ad tent-naf ttbudunt arrac ugar n teqcicin. Akken yenna umedyaz Ben mouhamed deg wawal-is “Tizlit tecna Nwara”
Asmi bdiɣ la ttnerniɣ ,
Ḥulfaɣ ziɣ yella leḥyaf.
Taqaɛet-nni ideg ɣliɣ,
tettdeggir-iyi-d ɣer leryaf.
Di mkul taswiɛt ttwaliɣ,
Ala arrac i nessmenyaf.
Ur yeqqim ara kan urkaḍ n yizerfan n tmeṭṭut di twacult-is n tlalit, ula mi ara tezwej aɛdaw-is amenzu n tmeṭṭut d tameṭṭut, imi ar ass-a amseččuy yezga gar temɣart d tesli. imi tamɣert tḥemmel ad tili dimma d timḍebbert ɣef teslit. Tislit daɣen, yella wanda ur tɛeffu ara i temɣart. Ihi yella wanda tikwal d tameṭṭut i yezwaren deg yiman-is uqbel ad d-awḍen wiyaḍ ɣur-s, am akken i as –tenna tgelzimt i tzemmurt:’’ afus deg-wen ay isɣaren ‘’.
“Lɛid amerbuḥ akk i tlawin n ddunit”.
Brahim Benhamouche