« Ur as xetnen ara i tlemẓit tasiwit.Deg Yennayer necεulay times yellan d azamul n ussirem »
Deg yiwen udiwenni i yas-iga uγmis El-Tareeq,massa Amani tmeslay-d γef waṭas n tγawsiwin i yerzan timetti tasiwit.Deg wawal-is tefka-d amaḍan n yimezdaγ i yewḍen γer nnig n 21 alef d aqerru i yessudsen 10 n leεrac; « Yal lεerc yesεa amγar i t-yesselḥuyen,amγar-a sbeddayen-t-id yimezdaγ s tin n tugdut,ilaq ad yili d lεaqel d bab n nnif akked trugza,ma yecceḍ εezzlen-t yemdanen,tteksen-as adabu ».Ma d ayen yeεnan ddiyana di Siwa, tenna: »Imezdaγ akk d imselmen yeṭṭafaren asekkud amaliki i iǧehden di Tmazγa ».Deg tririt-is i yiwen n usteqsi yerzan ansayen tenna: »Mazal-aγ ar ass-a nettmeslay s tmaziγt,nesεa aṭas n leεwayed i s nxulef γef wiyaḍ;d amedya,nekni ur asent-nessedhar ara i teqcicin(ur asent-ngezzem ara iqibib-nsent)am wakken i ixeddmen yimasriyen-nniḍen.Tameṭṭut daγen γur-neγ ur tettlus ara lḥiǧab meεna tesburuy timeḥremt γef uqerruy-is ».Deg udiwenni-ya aγezzfan,Amani Alwachahi tmeslay-d γef Yennayer yellan d lεid i yezdin akk imaziγen: »Deg umenzu n Yennayer nettmagar aseggas amaynut,neskar deg-s imensi s seksu d lxeḍra,am wakken daγen i nettmagar deg-s inebgawen-nneγ s yeqbucen n yikkil.Seg wayen daγen i nxeddem ilmend n Yennayer,necεulay times yellan d azamul n tafat d ussirem ».
Mokrane Chikhi