Aniwa Aqbayli neɣ ahat Azzayri s umata ur yezzuzen ara Kamel Aouis s wurar d wamek yessawaḍ ddabex ɣer tcebbakin n yiɛessasen n waṭas n trebbaɛ ? Yezga iban-d am yitri, iteẓẓu lferḥ deg wulawen yal mi ara d-yecmumeḥ i yimferǧen ladɣa s tamart-nni i s-yernan sser. Ass-a, ala isem-is i d-yegran d wussan yuran s yisekkilen n wureɣ ama di JSK neɣ tarbeɛt taɣelnawt. Kamel Aouis, yewweḍ leɛfu n Rebbi ass n lǧemɛa iɛeddan deg unafag n tmurt n Fransa mi yettheggi ad d-yuɣal ɣer tmurt. D amuḍin, yerza ɣer tmurt-a iwakken ad idawi. Maca aṭṭan i t-ikecmen ur as-yeǧǧi asirem i tudert, iqecceɛ-it di lɛemr-is 58 n yiseggasen. Imi d amdan yeṣfan, yelḥan s nniya, imeddukkal-is ur t-ǧǧin ara ad yemmenṭer, bedden ɣer yidisan-is, gan-as ttawilat iwulmen almi yewweḍ ɣer Fransa. Akka i d tagmat !
Lexbar n tmettant-is mi d-yewweḍ iɣḍel-d leḥzen d ameqran. Miloud Iboud, yenna. « D mmi-s n tfamilt. Yesɛa amkan deg wul-iw, ass-a ur zmireɣ ad t-ttuq. » Ali Fergani, ur yeffir ara leɣben-is, imi yenna : « Kamel d yiwen n umdan yeččuren d asirem, ḥnin ɣer medden, yesɛa tissas. Lmut-is qerriḥet, teǧǧa-d ilem d ameqran.»
Yeǧǧa urar deg useggas n 1985, maca ur yeǧǧi ara tarbeɛt ideg d-yettwarebba, JSK.
M. Smail