Akken i d-nenna ddurt yezrin aṭas n tdukkliwinn temnaḍin yemgaraden i yesfugglen ass agraɣlan n tmeṭṭut i d-yettilin yal azemz n 8 deg wayyur n meɣres.
Seld asarag “Tameṭṭut taqbaylit gar yiḍelli d wass-a” i d-tewwi ass n sed 4 deg meɣres, deg tmurt n Canada, Massa Farida Zerrar i lmend n tfaska n tmeṭṭut, ula deg tmurt llan wid i t-yesfugglen. Ma nemmeslay-d ɣef ttiɛadat-nni ad d-nebder Tiddukkla Tadelsant Inaẓuren n Yiwaḍiyen i igan s tallelt n tdukkla “La Kabylie s’exprime” leqdic s wazal-is, ass n larebɛa iɛeddan, i lmend n lɛid n tmeṭṭut. Iɛeggalen n tdukkla-a, rzan ɣef lɛecra n tenzayt ɣer ulzuz Lbedḥa, anda mlalen d waṭas n tlawin n taddart n Yiwaḍiyen. Ruḥen dɣa akken d agraw, lḥan s tikli n uḍar azal n 3 n yikilumiṭren, ɣer tzeqqa n tmeɣriwin i asen-d-tefka tɣiwant ad tt-sxedmen baṭṭel. Daxel n tzeqqa-nni, wwin-d Mass Meqrani Ɛemmar aselway n Tdukkla Tadelsant Inaẓuren n Yiwaḍiyen akked umaru Benṭaleb Brahim awal-nsen ɣef tmeṭṭut d wazal-is di tmeddurt. Syin, tettunefk tegnit i kra n tmedyazin n temnaḍt, gar-asent Samya Mukaḥ, ad d-awint timenna d yisefra-nsent i wid i d-yusan s ṭṭaqa, ččuren amkan s tnaga n yiwen n uɛeggal. Deffir n tmedyezt, yella-d usenɛet n yiselsa sɣur tilawin i d-igan ccɣel-nsent s tumert d zzux. Ttiɛad-nni ur iɛeṭṭel ara, imi ur d-yelli deg-s usarag n Massa Urida Sider i tuɣ deg wahil. Daymi tekfa tmeɣra zik. Lameɛna send ad tefru, ttwaferqen yigerdasen i tlawin i yettekkan deg ttiɛad i tent-yeɛnan. Di taggara, s tallelt n tdukkla d tlawin i yesɛan tiḥuna n yingulen (gâteaux), yella-d ufraq n yigaṭuyen, iẓmi, lqahwa akked tay i tid d wid iḥeḍren i tegnit. Leqdic-a, yeḍra s umata akken iwata, yerna yessefreḥ tilawin, ladɣa Tiwaḍiyin.
Kaisa Khalifi