Ayen akk i d-yettak ugama, nezmer ad t-naf deg kra, ad yili d win ara aɣ-d-yefken abaɣur. D ameslay ɣef wacḥal n yisenfan n teḥcicin i yettiren deg wakal, i yebda yessexdam-itent umdan i tujjya seg talliyin tiqburin. Seg zik ar ass-a, aṭas n yimɣan i d-yettwakecfen, banent-d deg-sen ddwawi n kra n waṭṭanen neɣ n lqerḥ d lejruḥ iweɛren. Am teḥcict n merẓgursa i ufan yimezdaɣ n Ayt Smaɛel d ddwa n urɣay, tesseḥlay aglim i tečča tmes, tesseqcar-it tettarra-t-id amzun ur t-ttuɣ yeḥreq! Ɣas ma llant ddwawi-nniḍen i d-yennulfan i useḥlu n tmes, maca merẓgursa tettsellik aṭas, imi tessujay, terna tessenqas ccama i d-yettegran deg umkan i tent-yuɣen. Tikwal daɣen tettekkes-itt maḍi i win i yesɛan aksum d lɛali-t, ur t-yettḍurru lǧerḥ. Yeshel wamek ara d-iheggi yiwen taḥcict-a ma yella yeḥwaǧ-itt. Seld mi ara d-tettwaqleɛ seg wakal, ilaq ad as-ttwaḍeggren wafriwen izegzawen akkit, acku mačči deg-sen i tella ddwa. Ad qqimen kan yiẓuran-is iberkanen, ad iriden s waman mliḥ. Syin, yessefk, ad ttwaherrsen iẓuran-nni akken iwata alamma ssufɣen-d aman-nsen izegzawen. Dɣa, aman-nni, ad ttwaẓmen deg lḥila, ad ttwaǧǧen dinna ddeq-s n yisragen. Di taggara, mi ara sebken waman-nni, ttuɣalen-d d aẓmu (pommade) d azegzaw, tin i yettrasen ɣef umkan yerɣan akken ad t-teg ccɣel-is.
Kaisa Khalifi