“D ahdum, d taluft, Aẓeffun yettidir gar snat twuɣa, urɛad tefri yiwet, tennulfa-d ultma-s”. Akka i aɣ-d-yenna yiwen seg yimezdaɣ n temnaṭ-agi .
Tamezwarut, d yiwet n tlemẓit i yesɛan setta uɛecrin (26) d aseggas di laɛmeṛ-is, isem-is Ibaɛzizen Ḥafiḍa, n taddart Ibaɛzizen, taɣiwant n Tmizar, lɛaṛc n At Jennad, maca teddirir nettat d twacult-is deg Uẓeffun. D tuḥrict, d tumɛint, teɣɣar di tesdawit n Tizi-uzzu. Gar teswiɛt d tayeḍ, Ḥafiḍa Ibaɛzizen, teɣli gar yiɣuraf n waṭṭan, d ssiɛqa i d-ihummen fell-as d twacult-is d kra n win i tt-yesnen. Kkawent tgeẓẓal-is (insuffisance rénale), ula d timacinin-nni i as-yessizdidigen idammen (Dialyse), uɣalent ur nfiɛent ara. Tazmert, teɣli , ur d-yeqqim deg-s lǧahd. Imejjayen-is ,walan ala yiwet n tifrat, yessefk, ad tɛiwed tigeẓẓal (greffe renale) di tmurt n Fṛansa. D ayagi i yerran imezdaɣ n Uẓeffun d imezdaɣ n Tmizar, ad sdaklen iɣallen-nsen, ad sdaklen tikta-nsen akken ad jemɛen azal n umelyar n yiseṭimen akken ad tt-ceyyɛen ɣer tmurt n Fṛansa . Ass n lǧemɛa 17 di maɣres tanezzayt, azal 150 n yilmeẓyen s tkarrusin-nsen i yeṭfen abrid akken ad d-sutren tadrimt di tudrin n lwilaya n Tizi wezzu, tizi n tinzert imi arraw-is, zgan tteklen ɣef yiman-nsen. Iɛeẓẓugen , Tigzirt , Iɛekkuren , Iɣil n Zekri, d tigi i d timnaḍin ɣer wanida ara rzun . Ma d imezdaɣ n At Jennad, fɣen ɣer temnaḍin-nniḍen i d-yeqqimen: Qqaren Wat zik : ‘’Win i ten-yesɛan deg udrar, ur yettaggad ara deg uzaɣar’’. D tag i d tagmat di tallit n ddiq, d tag i d tinzert di tallit yeẓmen. Send, ad tefru twaɣit-a, yeɣli-d uhdum-nniḍen. Yeɛreq yiwen uqcic ass-nni n lexmis. Segmi yeffeɣ ɣef tlata d uzgen n tmeddit ur d-yekcim s axxam, Kra yedda yiḍ, qeccuc meccuc wer yerkid, iɣezran, imudaɣ, iberdan, iri n lebḥar, ur ǧǧin amekkan. Lǧemɛa, kra yedda wass d anadi, Tigzirt, Bgayet, Assif n Lḥemmam, anda i d-iban cwiṭ n ccek, rzan ɣur-s . Targayt, tessaɣli ifadden, tegzem ifewdan. Bu qellaq, yettban ɣef wudmawen . D ass aberkan ɣef yimawlan. Ad tili d tlata d uzgen (3h3O), ass-nni n lǧemɛa, mi d-ssawlen yiɣallen n laman i baba-s u nnan-as mmi-k iban-d, nufa-t. Acu kan, mazal aqcic ɣer yiɣallen n laman imi yettkemmil unadi ɣef ssebbat i yellan deffir tedyant-a. Awi-d kan imi i dyuɣal s axxam, yuɣal-d RAHIM Taḥarbuct ɣer twacult-is, ɣer taddart-is, ɣer yimdukal-is. Ilaq tadyant-a, ad teqqim d tamsirt , d amedya i yimawlan s umata . lḥaṛs? diri-t, ttnefcic diri-t, tulya n tewwurt diri-t. Yessefk yal ababat, yal tayemmat, ad rren s lmendad i dderya-nsen.
Kader Belaid