Ddurt kan segmi sfugglen ass aɣelnaw n yimeɛḍar, kkren yiɛeggalen n Tdukkla Tadelsant «Idles» i uheggi n tigawt-nniḍen akked yimdanen at asrayen uzzigen (besoins spécifiques). Tikkelt-a, d tuffɣa seg Xerraṭa i d-yellan d ahil, akken ad yebbuḥri wa, ad yettwakkes uxiqi ɣef wa. Tanezzayt n tazwara n ddurt yezrin, ṭṭfen yiɛeggalen n tdukkla d yimuḍan abrid ɣer waɣir icebḥen n Jijel. D tirza ur nezmir ad tettwattu ɣef wakken i d-yenna yiwen seg wid i d-yessuddsen asihar, imi ala azmummeg i izedɣen udmawen. S wayen akka i d-yettilin deg unnar, d lebɣi merra i iɛemren at tidukkla-a, nessaram ad yili usemmed n leqdic deg Draɛ Lgayed ula ɣef yidles i tettawi d isem tdukkla-a. Afud igerrzen!
M. K.