Tameɣra-nni yettuɛynen ad d-tili ass-nni n 8 deg meɣres, yuɣal yeẓuẓ-itt Usqamu aɣerfan aɣiwan n Ait Aissa Mimoun, i d-isuddsen tameɣra-agi ara d-yilin ass n lexmis 30 deg meɣres 2017 deg tzeqqa n tmeɣriwin «Les Berbères». D tameɣra ideg ara cennun 14 n yinaẓuren n lwilaya n Tizi Uzzu, yecban: Karim Khelfaoui, Mouh Oubelaid, Dahmani Belaid, Siham Stiti, Mouh Bouchiba, Kaci Boussad, Ouazib Med Ameziane, Ahcene Bedrani…atg. Ma deg useddu n tmeɣra-agi, ad d-tili sɣur Rabah Boujaboud akked d Hayat Remdani. Ad d-nesmekti belli ama d tameɣra-agi n ccna n wass n lexmis, ama d timliliyin n ddabex uḍar i yellan yakan deg wussan iɛeddan, deg unnar aɣiwan n tɣiwant n Ait Aissa Mimoun, yellan deg “Tiplakin” tama n tesnawit n “Med Oudiai”, llant i wakken ad yessiweḍ Usqamu aɣerfan aɣiwan n Ait Aissa Mimoun, ad d-yejmaɛ idrimen i teqcict-nni tamuḍint n taddart n Uqawej, tagi d tamsiwt “Sellah Souhila”. Iwumi i d-ttwaḍelben waṭas n yidrimen, i wakken ad tdawi aṭṭan-is imi d tameɛdurt, werğin telḥi ɣef yiḍarren-is.
Adaoun Abdelghani