Cwiṭ akka a-tt-a tuɣal-d tenna-as :
-A nnger-ik ma d wagi i d amger ! Wagi d-tewwiḍ akka d lemqes ay argaz mačči d amger ! Ah ! A tameṭṭut! D amger i d-uɣeɣ mačči d lemqes !
Ikker-d urgaz-nni iruḥ ad iwali s wallen-is ma s tidet ayen i as-teqqar tmeṭṭut-is. Iddem-d ayen akken deg yenneḍ umger-nni, ifsi-t-id issawel-as yenna-as :
S leɛqel-im i telliḍ a tameṭṭut ! Acu t-akka ara d-teqqareḍ ? I wagi mačči d amger ? Argaz irfed-d amger seg ufus-is isneɛt as-t i tmeṭṭut-is.
-Wagi d lemqes ay argaz mačči d amger !
-Xzu ciṭan inɛel-it a tameṭṭut, wagi d amger ur yelli s nnig-is ur yelli ddaw-as.
-Nniɣ-ak-in wagi d lemqes, mačči kečč kelxen-k-id nekk ad iyi-tkellxeḍ.
Tameṭṭut tugi ad tebru i wawal, ttnaɣen akken, netta iqqar-as d amger nettat teqqar-as wagi d lemqes. Argaz issusem iruḥ am win ur numin ara iman-is.
Azekka-nni ikker zik, iruḥ yuɣal ɣer win akken i as-id-izenzen amger-nni. Deg ubrid argaz d-yemlal ad as-isneɛt amger-nni ad t-isteqsi ma d amger neɣ d lemqes. Nnan-as-id akk d amger mačči d lemqes. A win isteqsa ad d-yezzi ɣer-s ɣer deffir ad -as-id-istebɛa tamuɣli, wehmen akk deg urgaz-agi d acu t-yuɣen neɣ d acu i t-id-ibdan akka ! Wa yenna aḥlil, wa yenna meskin wa yenwa maḍi d lweɛda i yebɣa…
Argaz, ikemmel abrid-is alammi yewweḍ ɣer win i as-id-izenzen amger. Ikcem ɣur-s, issers-as zdat-s amger-nni yenna-as :
-A leflani iḍelli xelseɣ-ak-in amger tefkiḍ-iyi-d lemqes.
-Wwah ay argaz ! D amger i ak-n-fkiɣ. Ma ihwa-ak ad ak-t-in-bedleɣ meɛna ur iyi-d-qqar ara kan wagi mačči d amger ! Yerna yak tessneḍ-iyi werǧin i k-zenzeɣ ayen ur nelhi ara. Ar taggara ma ur tebɣiḍ ara ad t-tawwiḍ ulac uɣilif ad ak-in-rreɣ isurdiyen-ik…Meɛna ay argaz n lɛali wagi i d amger.
Ramdane Lasheb