Tameɣra n tzemmurt deg Ait Zaim

Partager

I lmend n usfugel n wass aɣelnaw n useklu d wass agraɣlan n teẓgi, Tiddukkla tadelsant «Tigejdit» n taddart n Ait Zaim, yettabaɛen ɣer tɣiwant n Maâtkas, tesuddes-d tazrigt tis sebɛa n tfaska n tzemmurt. Tella-d tmeɣra-agi deg tlemmast n taddart, tedda ɣef teɣzi n 4 wussan, imi tebda ass-nni n ttlata 21 seg meɣres, temdel tiwwura-s ass n sem 24 seg waggur-agi ideg nella. Aṭas n yidisan i d-isuddsen leqdic-agi, gar-asen , Tiddukkla tadelsant «Tigejdit» akked Tesqamut n taddart n Ait Zaim, Taneɣlaft n yidles, Aseqqamu aɣerfan awilaw n Tizi Uzzu, Aseqamu aɣerfan aɣiwan n Maâtkas, d waṭas n tesyar n uzemmur ama d tiqburin neɣ d titrarin…Ahil yettwaxedmen, yella-d d amerkanti sɣur imsuddsen-agi, aṭas n yirmad i yellan deg ttiɛad, gar-asen tirza ɣer tesyar n uzemmur tiqdimin d tejdidin n tama-agi. Sneɛten-d amek i d-yettili uleqqem n uẓebbuj i wakken ad yuɣal d tazemmurt. Aṭas n temsikniyin i d-yellan, ideg i d-seknen leṣnaf n zzit n uzemmur yellan, d wid n uzemmur, tin tewsatin yemxalafen n tamemt, d tin n talaɣt. Am wakken diɣen i d-llant temsikniyin-nniḍen yecban : tiqnedyar n Leqbayel, isufar i d-ittekken seg zzit n uzemmur, lfeṭṭa, idlisen…atg. Yella-d daɣen usenzi s ubuddu sɣur waṭas n yimyura d yimedyazen, d waṭas n temsikniyin n yidlisen sɣur kra n tezrigin n tmurt-nneɣ. Mebla ma nettu isaragen i d-fken i yifellaḥen d wid yellan deg taɣult-agi n tfellaḥt. Llant-d diɣ tmeɣriwin n ccna sɣur waṭas n yicennayen iqbayliyen. D waṭas n tɣawsiwin d yirmad-nniḍen i d-yellan ɣef teɣzi n 4 wussan-agi, ideg i d-yella ttiɛad.

Adaoun Abdel Ghani

Partager