Taddart Isummaten , d taddart gar tuddar n tɣiwant n Uzeffun, tezga-d ɣer umalu-s, ɣef ubrid aɣelnaw 24, ɣer yiri n teftist Taɣɣza n lebḥaṛ, tebɛed ɣef walmus n tɣiwant azal n seddis (06) ikilumtren.
Mi ara tawiḍ abrid metwal Aẓeffun, taddart Isummaten, ad ak-id-tbin s ddaw ubrid, ɣer telqay n yeɣzer . Ttidirent deg-s azal n 88 n twaculin. Mi nerza ɣur-s , muggren-aɣ-id yimezdaɣ-is s tmuɣli n usḥissef, tamuɣli n layas imi akken qqaren imezwura-nneɣ : “ Yal lɛella, tuɣ lalla”, qqaren diɣen :” Iṛuḥ wul ad yekkes lxiq, yufa leḥbab d imuḍan “. Ulac tin i ten-izeglen, uguren ggten-d fell-asen, yal tama d tiyarrist . Deg useggas 2017, anda tudrin-nniḍen, suturent allalen atraren n tmeddurt, imezdaɣ n taddart-a, mazal-iten deg usirem n timunent . Aɣerbaz amenzu, yemdel tiwwura-as, azal n snat tmerwin (20) n yiseggasen aya, d ayen i yerran inelmaden-nsen n uswir amezwaru, ad leḥḥun azal n kṛad (03) ikilumitṛen ɣer taddart n Mlata . Mi ara tedduḍ neɣ ara tadreḍ ɣer daxel n taddart, wicqa ad tnadid ɣef ubrid, imi wagi d awal kan . Abrid n taddart, mazal akken i t-ǧǧan yimezwura-nsen, d tizerggatin tudyiqin, d tiɛettabin, d isyaxen . Daya i yerran tiddin deg-s d ugur, ladɣa i wid i teǧǧa tgecrirt am yimɣaren d temɣarin, iggerdan imeẓyanen d tggerdatin . Ma yella-d umuḍin, yessefk ad uɣalen ɣer tinna n lejdud, ad t-id-ssuffɣen ɣer ubrid ukerrus i ibeɛden fell-asen azal n 800 n lmitra ɣef zzayla neɣ ɣef lluḥ ma ulac d abibbi. Ma d wid i yellan ɣer tama n wadda, yessefk ad d-lhun azal n yiwen ukilumitr alamma d abrid ukerrus . Akken i aɣ-d-yenna yiwen seg yimezdaɣ n taddart Mass Ɛumaṛ Tasayust :” am wakken i as-yenna Fellag , taddart-nneɣ tesɛa yiwen n uyaziḍ d yiwen uɣyul d yiwet n tezzut”. Awal-agi yeẓẓay deg wayen i yezzuɣur, imi ula d allal n trisit ixus nezzah. Azal n 12 n twaculin ur qqinent ara s lexyuḍ n wallal-agi i yuɣalen d tudert n yal amdan deg umadal . Tiwaculin-agi, bnant ixxamen imaynuten, qarbent-d ɣer ubrid, imi tudert anda llan yakan d amihi i dderya-nsen. Ayen i d-ijebden lwelha neɣ tamawt, d aman yeblulɣen neɣ tizuliɣin, imi ulac iqadusen ara yessufɣen aman-agi, d ayen i yerrran imezdaɣ, yal yiwen ad yeɣz tasraft-is deg wayla-s. Ayagi, yegla-d s yiwen wugur meqqren i tfarkiwin-nsen, i lɣella-nsen d tezmert-nsen . Deg wussan n tegrest, imezdaɣ n taddart-a, ladɣa wid i yebnan ɣer tama-nniḍen n yeɣzer, heǧben deg uxxam, ur ttizmiren ara ad d-fɣen. Ulac kra n tqenṭert neɣ kra n umezgar ɣef wayeg ara d-zegren . “D ahbuh, d taluft”, am waken i aɣ-d-yenna yiwen seg yiɛeggalen n usqamu n taddart-a Mass Yusef Das, yerna -d: ” Di 2017, mazal nessaram timunent, mazal nessaram tafat, mazal nettargu ayen i ttidirent tudrin-nniḍen. Ad nessuter seg yimḍebbren n tɣiwant, seg yimḍebber n wasun n Uẓeffun ad d-rren lwelha ɣur-neɣ , ad aɣ-d-fken amur-nneɣ am nekkni am tudrin-nniḍen “. Di taggara n temlilit-nneɣ d At Isummaten, nezmer ad d-nini taddart-a, tettidir gar tatut d usirem.
Kader Belaidi