Aneḥbus n usekcem n yisufar n wučči yecban igumma seg tmura n lberrani yeldi tiwwura i usali deg ssuma n tuget n yisufar deg leswaq.
Ɣas akken deg tizwar d lbanan d tudeffaḥ i tsuma taluft-a n leɣla, maca taggara-agi iɛum ula deg wayen i d-yettwakkasen deg tebḥirin. Ṭumaṭic yellan tettnuz s 30 n yidinaren, tuɣal ɣer 150, mi akken ticcert tewweḍ s anda ur tt-yessawaḍ umdan: 1400 n yidinaren i kilu ! Ma d lbaṭaṭa tettlawaḥ gar 90 d 100 n yidinaren ɣas ma yella akka tignawt teṣfa, acku yal mi ara yili ugeffur ttafen-d tamentilt dakken ulamek ara tt-id-kksen degmi tuli deg ssuma. Abesbas ur neḥwaǧ ula d kra n ttawil meqqren, yerna deg ssuma s wazal n krad n yiḥricen imi seg 30 yuli ɣer 90 n yidinaren. Tura akka mi d isufar n tmurt wwḍen ɣer tizi yecban ta, ur d-yeqqim useqsi ɣef wayen i d-yettasen seg lebɛid. Lbanan, win akken yellan ɣef wudem ufus i yal yiwen, yekka akin i tizi: 900 n yidinaren i kilu, ma d atteffaḥ yewweḍ ɣer 1250 n yidinaren i kilu. Lkiwi ulamek ara akk ara t-id-yebder umdan imi a-ta-n deg tqacuct s 1500 n yidinaren i kilu. Tuget n yimdanen i d-nemmuger deg ssuq n temdint n Tubiret ur bhiten ara seg leɣla iḥuzan isufar-a i d-yettasen seg berra, maca lɣiḍ-nsen mi walan ula d ayen yettwaxdamen deg tmurt-nneɣ yewweḍ akka. “ Amek i yezmer umdan ad yidir s tjernant-is sdat leɣla yecban wa? “ I d-yenna s usḥissef yiwen n ubabat deg ssuq. Ameddakkel-is, aḍellaɛ d ilem, itezzi, yeṭṭafar s wallen, yenna-d:” Negguma ad nqerreb ɣer yimsenza, imi yal taɣawsa ara tsamiḍ ad ak-id-teqqes. Amek ara nawi lbaṭaṭa s 100 n yidinaren d ṭumaṭic n 150 n yidinaren ? Ɣef wakka i ttwaliɣ, s kra n win yettɛicin s tjarnant-is, ad d-yers fell-as ṭṭlam deg wass. Ulac s wacu ara nqabel tarwa. ” Akka tura ssuma n yisufar tewweḍ sanda ur as-izemmer umdan, aṭas n yimdanen i yekcem uɣilif ɣef wamek ara teḍru yid-sen mi ara d-yaweḍ waggur n Remḍan, yettwasnen s leɣla.
M. Smail