Mazal am teɛwaydit-is, tessefraḥ tdukkla Sumam i ulethi d ugujil igujilen d tuǧǧal n temnaḍin yemxalafen n Bgayet yal mi ara as-d-tas tegnit. Am tikkelt iɛeddan, i lmend n Yennayer, anida i d-tesseḥḍer yiwen n wahil d amerkanti, s tmedyezt, isaragen, tignatin n useḥḥer d waṭas n tigawin-nniḍen. Dɣa, ttiɛad aneggaru seg warmuden-is i wayyur-a n meɣres, yeḍra-d ttlata yezrin, mi d-heggan yiɛeggalen ilemẓiyen n tdukkla-a yiwet n tirza n uḥewwes d umerreḥ ɣer tejnant n umerreḥ deg waɣir n Jijel. Aya yella-d i yigujilen d tuǧǧal i iḥulfan s tegnit yeḥman, n tayri d tegmat segmi yeqleɛ usakac tasebḥit armi d tuɣalin tameddit. D ayen i yuɣalen d tannumi dɣa ɣef leḥsab n yiɛeggalen n tdukkla i d-iwekkden s usmurres n tuffɣa-a am yal tikkelt.
M. K.