Deg yiwet n liḥala n leḥzen i d-tella ass n lǧemɛa tameddit yiwet n temlilit n tegmat n ddabex n uḍar deg taddart n Hagui deg tɣiwant n Leɛǧiba i d-yellan d tajmilt ɣef terwiḥt n Yuba.M, yewwḍen leɛfu n Rebbi deg wussan-a yezrin ɣef 15 n yiseggasen deg leɛmer-is. D aqcic awḥid deg twacult, Yuba yella d anelmad deg uɣerbaz alemmas Dahmani Slimane n Semmache mi d-yudef ɣur-s waṭṭan ur as-nefki ara tagnit i wakken ad yessenser seg-s. din yeɣli, din yunag ! Ama d imeddukkal-is neɣ ahat ilmeẓyen n taddart i merra kkren taggara n yimalas yezrin i wakken ad d-heggin timlilit-a, meqqar ad wansen tawacult-is deg teswiɛt-a qessiḥen i tettidir. Mačči kan d imezdaɣ n Hagui i d-yerzan ɣer unnar, maca At Yilyiten anda ma llan bedden ɣer yidis n yimawlan n Yuba i wakken ad d-inin:”Iruḥ-aɣ akk uqcic-a, mačči ala i twacult-is.” Imḍebbren n yiḥricen yemxallafen llan-d deg lmendad deg temlilit-a, imi aselway n tɣiwant, imḍebber n Ddayra n Beclul d waṭas n wudmawen-nniḍen rran-d i tinnubga n yilmeẓyen n Hagui, ḥeḍren i tejmilt yuɣalen i uqcic-a. Amenzu deg-sen d aselway n Ddayra Mass Ait Ali i iḥeḍren i temlilit almi tekfa. Imḍebber-a, ibeggen-d lferḥ-is sdat temlilit yecban ta mi d-yenna:”ad rreɣ tajmilt i widak i d-iheggan ccɣel yecban wa, imi d abrid ara yawin ilmeẓyen ɣer yimal igerzen, win n leqraya, addal d tikli lɛali. Ad farseɣ tagnit i wakken ad ɛezziɣ tawacult n Yuba, u ad niɣ aqel-i ɣer tama n yimezdaɣ akk n Ddayra.” Timlilit tella-d deg tegnatin yelhan imi ula d iɣallen n usellek llan-d deg lmendad i wakken ad tekfu temlilit s rbeḥ n terbaɛt n Hagui s rebɛa n yiswiyen ɣer sin i terbaɛt n Uzaknun.
M. Smail