Anwa ur nessin Aẓeffun , anwa ur nerzi s Aẓeffun ? Ḥemlen-t akk, ladɣa deg wussan n uẓɣal, neɣ ahat wid i d-yettmennin učči n yiselman, neɣ ahat i tukksa n lxiq rrif n lemwaji n yillel, tikli ɣef rmel n tenfusin-is. Wid i t-id-yettwalin si lbeṛṛa, neɣ wid i d-yetterzafen ɣur-s di teswiɛt d tayeḍ, ɣur-sen amzun d lǧennet, amzun d tibḥirt n targit. Am wakken i as-isemma umedyaz d unaẓur muccaɛen Kamel Ḥemmadi di tezlit-is: ” Aẓeffun, tibḥirt inaẓuren” . Ih, d tibḥirt n yinaẓuren, imi aṭas i d-yefka, aṭas n tgejda n tẓuri tazzayrit n temnaṭ-a, yecban : Igerbucen, Isyaxem, Ṛwiced, Ḥnifa, Ḥilmi, Ɛabed, Faḍila Zziriya, Ǧawut d waṭas yid-sen. Yefka-d imeɣrasen, inaddalen, imawlan n tsekla, ula d imeɣnasen n umennuɣ ɣef tinzert am mMass Belɛid i yettwasnen s yissem n Bacaɣa n taddart n At Ṛhuna i yeslemden Tifinaɣ deg yiseggasen 1963 deg uxxam-is n temnaṭ-a. Maca, imezdaɣ n temdint n Uẓeffun, ttwalin-t akken-nniḍen, imi kra n tmecṭuḥt neɣ n tmeqrant, nutni ddren-tt, telha, neɣ diri-tt , tecbaḥ neɣ tecmet. Am wakken i as-yeqqar yinzi :” s ufella, yecbaḥ yerqem . Daxel, mi i as-tegliḍ yerka”. Deg unebdu d ddiq, di tegrest d lxiq, am wakken i yeqqar Dda Ɛmer . Ladɣa ass n ssuq i d-yettilin d lexmis . Aḥlil ma yella-d umuḍin, aḥlil ma tɣesbeḍ tikli, aḥlil-ik ay amsebrid deg wass n lexmis di temdint n Uẓeffun . Ur yelli wansi ara trewleḍ, ur yelli wansi ara tɛeddiḍ, yal tiɣmeṛt d ẓdiḥ, ma teɣli-d tsegnit, ur tettnal lqaɛa, imi iɛum umdan, d wid yesnuzun neɣ d wid yettaɣen. Ssuq-agi n lexmis, xas ɣer wiyiḍ ttwalin-t d agrruj ladɣa wid-nni i d-irezzun ɣur-s akken ad senzen tiɣawsiwi –nsen, maca ɣer imezdaɣ -is d ugur, d amihi, d lɛella. Kra n yimḍebber i d-yusan, yugi ad as-d-yaf tifrat, imi ur bɣin ara ad as-d-afen tifrat. Ugin ad walin uguren n tidet n yimezdaɣ, ugin ad seddun tamdint-agi ɣef wayen sefran yimedyazen d tmedyazin ɣer sdat. Ugin ad zwin fell-as aɣebbar n tkerkas. Ttwalin kan taclimt n s ufella. Dabrid i d-yeǧǧa yimekcem afṛensis i mazal ar ass-a. Ulac amṛaḥ amaynut, ulac abrid n talwit, ur yelli uzrug i tuffɣa . D agi i tella tuttra . Wissen acimi i t-ǧǧan akka? Wissen acimi ur bɣin ara ad yennarni am netta am temnaḍin-nniḍen ? Wissen acimi d ayen yezrin xir n wayen i d-itteddun ? Tiririt, tban , teshel, ur teḥwaǧ ara ad tnadiḍ aṭas deg wallaɣ-ik. Aẓeffun, rran-t yimḍebbren–is d allal i wurar , d asafar n tjaṛa di tefranin . Yuɣal d takurt gar yifassen n yimsartiyen, rran-t d ččir gar yiḍarren n yikabaren. Aẓeffun, brin-t yiɣuraf n tsartit taderɣalt , gezren–t wid yettṛebbin lullu, snarnayen yis-s sɛaya n tedrimt-nsen . Am waken i d-yeqqar yiwen seg–sen : “ Aẓeffun yessefk ad yeqqim akka, am tfelwit-nni i yesunneɣ unaẓur, yal mi ara tiqdim, irennu wazal-is “. Yah, timdinin ttnarnint di yal tama, deg yiberdan, di lebni, deg yisenfaṛen ara d-yawin lfayda i warraw-is …Aẓeffun, bɣan ad t-ǧǧen d axrib gar yixerban n umezruy, gar yixerban n tatut.
Kader Belaidi