Taɣiwant n Beclul yessawḍen teldi yiwen n ssuq ixeddmen deg wussan n lǧemɛa d lḥedd, tesnerna amecwar-is deg unnar n tdamsa imi deg yimalas yezrin amkan-a yettuxeṣṣen i ttjara yeldi tiwwura-s i tkeryas. Ass n letnayen yezrin, imi d ass i yettwafernen i uḥric-a n ṭumubilat, aṭas n yimdanen i d-yerzan ama d wid ara yaɣen neɣ wid ara yessenzen. Deg tafrara, ama seg temnaḍin n twilayt ama seg tid i as-d-yezzin, tikeryas msennadent ta ɣer ta, imi isalli yuɣ lḥal yedda akken iwata, ɣas akken ur d-yelli ara s ttawilat atraren. Seg tama nniḍen, yessefk ad d-nesmekti dakken ɣas ulama aṭas n tkeryas i yellan, maca ur nwala ara akka lbiɛ am waken yetturaju lḥal. Leɣla yuɣen leswaq nniḍen yecban Tijellabin, Aomar d Uqbu yewweḍ-d ula ɣer Beclul. D ayen dɣa i d-nnan kra n wid nemmuger:” s tidet, nefreḥ s ssuq yeldin tiwwura-s da ɣur-neɣ, maca nettwali dakken tecɛel tmes ! Gguman yimdanen ad aɣen, imi azalen n tkeryas iɛedda tilas.”Iwulem daɣ ad d-nesmekti belli ass amenzu ideg yeldi ssuq-a tiwwura-s ur d-telli tebzert I wid ikecme.
M. Smail