Yal aseggas, mi ara d-yaweḍ 20 di yebrir, tasa tettenhaz ɣef wayen yeḍran deg useggas n 80. D ayen yeǧǧan s kra n win yumnen s temsalt-a ad iger tamawt ɣer wayen iɣer newweḍ ass-a iwakken ad yerr tajmilt I wid d tid I d-yessaɣen asafu I usǧuǧǧeg n tmaziɣt. Tajmilt-a, yal wa amek i yefren ad tt-yerr. Nwulef akka tikli d tmesbaniyin, isaragen, aneḥbus ɣef uxeddim. Maca, tikkelt-a, llan wid ifernen ass n 20 di yebrir iwakken ad d-yili d tagnit i usenṣeb n uselmad amezwaru n tmaziɣt deg Umalu n tmurt. D aɣerbaz Medjaoui Rachid deg temnaḍt n Rremci deg Tlemsan i yeddren adyan-a, anda iselmaden imerra n uɣerbaz-a mmugren-t s lferḥ. Kouceila Iskounene, d aselmad i terza temsalt-a, yenna-d:” s ccuq i rǧiɣ ass-a, aqel-i ddreɣ-t amzun akken d targit.” Gar wid i iḥeḍren, d Souria, yiwet n tselmadt n tefrensist deg Maɣnia, tenna-d:”Ur nwiɣ ara belli yewweḍ uselmed n tmaziɣt s aswir yecban wa. S tidet, behteɣ mi walaɣ inelmaden amek i d-qqaren aḍris n Mouloud Feraoun, d wamek i ssawḍen ad dcnun tizlatin s teqbaylit. Ma d ayen yerzan tira, wagi d asurif ameqqran i yuɣen yixulaf-a.” Anemhal-is, M.Abderrahmane, yerna-d:” Ɣas akka ɣur-i lebɣi iwakken ad d-fkeɣ s kra n wayen iwumi zemreɣ I uselmed n tmaziɣt, maca s ya d afella, ad d-muddeɣ s nnig n tezmert, imi ass-a ddreɣ ayen I nwiɣ zik-nni d aqesser. Umneɣ tura belli s tmaziɣt ad nesnerni tamurt-nneɣ.” Ad d-nesmekti belli, 04 n yiselmaden i terza temsalt-a n usenṣeb deg Tlemsan, iwakken ad d-taweḍ nnuba n 04 nniḍen deg useggas aɣurbiz I d-iteddun. Iwakken yella-d usenṣeb-a, tasweḍt tamatut twekkel amaswaḍ n tmaziɣt yellan deg Tubiret iwakken ad d-yelhi s ccɣel-a, imi tamneḍt-a n Umalu ur tesɛi ara amaswaḍ n tmaziɣt. seg tama-s, tamehla n Usegmi n twilayt-a ur teɣfil ara ɣef ttawilat ilaqen iwakken ad tessishel amahil I umaswaḍ-a.
M. Smail