Ass-nni n lɣemɛa iɛeddan, i d-tella yiwet n temlilit tameqqrant deg taddart Ait Allaoua,deg tɣiwnat n Iboudrarene i wakken ad semmin s wudem unṣib i yiwen n usebdad i yebnan s ddemma i yimeɣrasen Mbarek Ait Hammouda, Salem Ait Mohand Said akked Amar Ould Hammouda. Aṭas i iḥedren temlilit-ag, ad naf gar-asen : tiwaculin n tlata n yimeɣrasen-agi, imjouhad, tuǧgal d yessi-s n yimjuhad, amaru amatu n lwilaya n Tizi Uzzu, iselwayen n tɣiwanin n Ighil Bouamas, Iboudraren, Akbil akked Tizi Uzzu d yimdanen-nniḍen i d-yusan s lketra. Llant-d kra n tnagitin d wawal ɣef umecwar n yimeɣrasen-agi sɣur yimjuhad akked twaculin-nsen. Akka, dɣa, i d-yenna Ouahab Ait Menguellet, mmi-s n Mbarek Ait Menguellet : ‘’ferḥeɣ aṭas imi i d-tusam s waṭas ɣer temlilit-agi. Ayagi, yesbanay-d d akken imawlan-nneɣ ur ruḥen ara kan akka d asfel ɣef tmurt », i d-yesmekti uselway n tɣiwant n Tizi Uzzu, O. Ait Menguellet. Ma s tama n Tuddsa taɣelnawt n yimjuhad, yenna-d Si Ouali : « Akken kan tefra lgerra, steɛrfen yimḍebbren d akken Mbarek Ait Menguellet akked Ould Hammouda Amar d imeɣrasen. Aya, ulac fell-as. Ma yella seg tama n Salah Ait Mohand Salah, ar tura ulac arrat i d-ffkan yimawlan-is i wakken ad yettwasteɛref yis-s. Ihi, teqqim ɣer imawlan-is i wakken ad t-awin ɣer Kasma n Yattafen, syin ad yettwaceyyeɛ ɣer tneɣlaft n yimjuhad i wakken ad yettwasteɛref yis-s». Uqbel ad d-tili temlilit-agi, yerlla-d unejmuɛ deg Tasaft Ugemmun anda sersen timeqqunin n yijeǧǧigen ɣef yiẓekwan n Mustafa Bacha, Djaffer Ouahioun, Kaml Ait Hammouda d AzeddineYousfi.
Hocine Moula