Yettili-d wass agraɣlan n tfaska n yixeddamen, yal amezwau n maggu.Yella-d ass amezwaru deg tmurt n Marikan. Ass n ssebt 1 deg maggu 1886 deg temdint n Chicago, ugar n 340 000 n yixeddamen i iḥebsen ɣef uxeddim-nsen, mebɛed mi asen-d-ssawlen sandicat-nsen, ladɣa tarbaɛt n Les anarchistes. Syin, ḍrant-d aṭas n tmesbaniyin anda i d-tella ula d lmut. Deg uḥbas-nsen ɣef uxeddim, ssuturen kra n yizerfan-nsen. Deg umezwaru, ssutren ad xeddmen kan 8 n swayeɛ i wass. Ihi, ass n ssebt 1886, deg temdint n Chicago, kkren-d aṭas n sindicat ḥebsen ɣef lxedma. Ugar n 12 000 n lluzinat i iḥebsen ɣef uxeddim. Syin, kemmlent tmesbaniyin deg ussan i d-iteddun armi tekker gar yixeddamen akked yiɣallen n laman anda mmuten ugar n 12 n yixeddamen akked 7 n yimdanen n yiɣallen n laman. Aṭas n yimḍebbren, diɣ, n yixeddamen i wwin ɣer leḥbas, llan wid iwumi ḥekkmen s lmut, syin nɣan-ten. (Ḥekkmen fell-asen ass n 21 yunyu 1986, nɣan-ten ass n 11 deg tuber 1986). Tlalta n yiseggasen, mebɛed, deg useggas1889, yennejmaɛ Usqamu International Socialiste deg tmurt n Fransa u rran amezwaru n maggu d ass n umennuɣ n yixeddamen. Seg tmurt ɣer tayeḍ, yemgarad amek i t-sfuggulen. Yettili-d wass agraɣlan n yixeddamen d ass n lficṭa ama deg tmurt n Lezzayer ama deg waṭas n tmura n ddunit.Acu kan i wakken i d-yewweḍ wass-agi n lficṭa, aṭas n umennuɣ d lmut i d-yellan deg yal tiɣmert n ddunit. Mazal ar ass-a yettkemmil umennuɣ n yixeddamen imi ar tura urɛad i d-ḥellan izerfan-nsen akken ma llan. Xas ulamma ḥellan-d yixeddamen 8 n swayeɛ kan n lxedma meɛna mazal anda ttuneḥsaben am waklan, ladɣa deg tmura-agi n Tefriqt n unẓul, deg Usamar alemmas akked kra n tmura n Marikan anda mazal sseqdacen ula d aklan, neɣ ɛad rran-ten d aklan. Yettili-d usfuggel n umezwaru n maggu n yal aseggas s tmesbaniyin akked tikliyin i d-ssewjaden sandicat n yixeddamen neɣ ikabaren n tsertit. Aya, yettili-d deg tmura anda tella tugdud. Ma deg tmura anda yebna leḥkem ɣef ẓẓur akked tmeḥeqqranit, yettumenneɛ laqdic am wagi, xas ulamma tikwal ass n umezwaru n maggu d ass n usgunfu u yettwaxelles.
Z. A. Y.