Yal amezwuru n waggur n maggu, aṭas n tmura i yesfuggulen tafaska tagraɣlant n yixeddamen, s qeddac n tigawin yemgaraden.
Belḥeq-d umenzu n maggu, tewweḍ-d tfaska tagraɣlant n yixeddamen. Kra n wid d tid i iqeddcen, ama s yifassen neɣ s wallaɣen, tuɣal-asen tejmilt imi tamsalt d nutni i teɛna, mačči d wiyaḍ. Ɣas, amedya, aqeddac ur yesli ara deg lɛid-is-agi i ubarek, neɣ ur yeṭṭif asefk sɣur walbaɛḍ n yimdanen, maca ilaq ad yeḥsu dakken d ccɣel-is i d kullec-is. Yessefk ad izux s yiman-is imi ixeddem, iḥemmel ad yexdem! Ad yumer daɣen imi yezga d urmid deg wussan-is, mačči d ameɛduz i ibeɣɣun kan iɣimi, win deg ur llin lettkal d lfayda. S umata, amdan, yettuxleq-d ad yeg ayen iwumi yezmer d nnfaɛ d leslaḥ deg tudert, ama i netta, tawacult-is, idles-is, tamurt-is…, atg. Acku ma yeɛteb yiwen ula ɣef wayen i yettusemman d ayla-s, leqdic-is ad yettuneḥsab d afud i t-yerna i yiman-is. Yal amezwuru n waggur n maggu, aṭas n tmura i yesfuggulen tafaska tagraɣlant n yixeddamen, s qeddac n tigawin yemgaraden. Llan yidigan ideg ttɣiman yixeddamen deg lɛid-nsen, steɛfayen deg-s, ɣas ma yeɣli-d deg wussan i yexḍan imuras n taggara n ddurt. Am wakken, d azal i ttakken i yismawen-nsen, imi imahilen i ḍefren deg tudert skanayen-d acu swan lebɣi d tayri i yisenfan n lecɣal-nsen i yettwafranen, neɣ i d-yettsiḥen. Ulamma tuɛert d leɛtab n yiqeddicen, ttilin d tiseddarin ta nnig ta, maca ad yeqqim uxeddim d win i ilaqen di ddunit akken ad teshel tudert.
A win iqeddcen qdec
Diri-t yiwen ma yetteɛdaz
Bnu, aru neɣ nqec
Ula deg uxxam yelha ubraz
Mi ara teɛyuḍ ɣas sgunfu
Ma tzemreḍ uɣal xdem
Lecɣal merra ur ten-ttɛuffu
Nceɛɛel times mi d-nzeddem.
Kaisa Khalifi