Asfugel s umulli wis 11 n “CNLST”

Partager

Imḍebbren n Unaris n waddal d umerreḥ n Tikjda, llan-d deg ttiɛad ass n lexmis yezrin i wakken ad sfuglen s umulli wis 11 n tlalit n Unaris-a. I wakken ad yennekmal lferḥ, wid yellan ɣef uqerruy n “Cnlst”, necden-d aṭas n yinebgawen, gar-asen iɛeggalen n tɣamsa am wakken i yeldin tiwwura i wid d tid yebɣan ad d-asen, ladɣa wid iwulfen amkan-a. Deg yiḍ n lexmis, mi d-yella akka usmekti d wazal yesɛa unaris-a deg usnerni n tmerrit deg temnaḍt-a, tella-d yiwet n tmeɣra anda tanaẓurt Nesrine tessuzen inebgawen. Tasebḥit n wass n lǧemɛa, ama d inebgawen ama d imerriyen i d-yerzan ɣer Tikjda, ttwanecden ɣer yiwet n tirza n kra n yimukan deg udrar n Ǧerǧer. D tikli n uḍar d umerreḥ ɣef tɣaltin i d-yellan, anda imusnawen n yimukan-a, skanayen-d i yimdanen agerruj n temnaḍt-a. D tirebbaɛ neɣ d tiwaculin, tiɣilt tettak-itent i tayeḍ, deg yiwet n tegnit n lferḥ d ccna. D tagnit ihi i fursen yimḍebbren n unaris-a i wakken ad d-neddhen s wudem unṣib tulya n tsemhuyt n unebdu, anda yettuhegga yiwen n usenfar meqqren i uqabel n yimerriyen, tirebbaɛ tineddalin d wid iḥemmlen agama.

M. Smail

Partager