Ass-nni n lexmis iɛeddan, 19 deg maggu 2017, i tekfa rreḥba tis 9 taɣelnawt n tzuri i d-ttheggin, yal aseggas, Uxxam n lḥirfat d tẓuri akked Usqemmau aɣefan n lwilaya n Tizi Uzzu. Timilit-a i d-yeḍran deg urti Colonel Mohend Oulhadj n temdint n Tizi Uzzu, tejmɛ-d 129 n yimdanen i iqeddcen deg tẓuri-agi, i d-usan-d 25 n lwilayat n tmurt n Lezzayer. Gar wayen i d-ssersen i lbiɛ akked temsikent, ad naf : lfeṭṭa, talaxt, taqendurt n leqbayel, anqac ɣef usɣar, tamemt, zzit n uzemmur, iɣerman n yal ssenf, taẓerbit d wayen-nniḍen. Xas ulamma ur d-yelli ara usenzi n sselɛa akken iwata, ɣef wakken i aɣ-d-nnan, meɛna tella-d lfayda seg tama-nniḍen. « D tidet, ur d-yelli usenzi n sselɛa s waṭas, meɛna yella-d umeslay gar-aneɣ. Nembeddal tiktiwin ɣef umahil-agi-nneɣ. Yal wa yefka-d tirmit-is d wamek iwala tifra i wuguren i d-tettmagar tẓuri deg unnar, ladɣa seg tama n yisufar s wayes nxeddem » i aɣ-d-yenna yiwen n unaẓur n lwilaya n Ɣardaya. Ma d Madjid i ixeddmen lfeṭṭa, iwala d akken ssuma n kilu n lfeṭṭa ɣlayet mačči d izli, imi tikwal, ttaɛen-tt-id seg ufus wis tlata, neɣ ɛad ugar. « Zik, nettaɣ-tt-id srid ɣer tkebbanit i teɛna temsalt, ma d tura ulac. Terra-aɣ tmara ad tt-id-naɣ ɣer wiyaḍ, anct-a irennu s waṭas deg yissuma. Nessaram ad aɣ-d-afen tifrat wid teɛna temsal, wid-nni yettwakkelfen s lbiɛ n lfeṭṭa». Seg tama n yimḍebbren, walan tifrat n wugur-a seg tlalit n yiwet n tkebbanit neɣ ugraw ara yettukelfen n lecɣal n usenzi d uswjed n sselɛa-nni s wayes xeddmen yinaẓuren-a. « Aql-aɣ ad nettwali amek ara d-nexleq yiwen ugraw ara yettukelfen s temsalt-agi n wuguren i d-tettemlili tẓuri deg unnar, ama seg tama n usenzi, neɣ seg tama nusewjed n sselɛa i tteḥwijin deg umahil-agi n tẓuri », i d-yenna Mass Ben Attah Redouane, imḍebber deg uḥric-agi n tẓuri. Am wakken i d-ttheggayen diɣ, ɣef wakken i d-yerna, yiwet n tannant i wid iqeddcen deg uḥric n tẓuri, timlilit anda ara yili ula d asefhem ɣef kra n ttawilat d yiwellihen yeɛnan tamsalt n usenzi, aqenneɛ d usefti n tẓuri-agi. Ɣef wakken i d-yenna Mass Abdelkrim Berki, aselway n Uxxam n lḥirfat d tẓuri n lwilaya n Tizi Uzzu, azal n 11 800 n yimdanen i ixeddmen deg uḥric-agi n tẓuri, 34% d tilawin. Yexleq-d umahil-agi ugal n 31 700 n yimukan n uxeddim deg lwilaya n Tizi Uzzu.
Hocine Moula