Tasebḥit n wass n lexmis 18 deg maggu i deg-i nella, teḍra-d yiwet n twaɣit deg ugezdu n tutlayt n taɛrebt di tesdawit n Tizi Uzzu. Yuɣ lḥal inelmaden di tzeɣwa-nsen mi teṭṭerḍeq yiwet tqarɛet n usexsi n tmes ( extincteure ) deg wannag ( étage) wis sin n ugezdu n tutlayt n teɛrabt. Cwi kan ulac lemḍerra tameqqrant ɣer yinelmaden. Yella-d kan wid iɣesfen s lgaz i d-yeffɣen s daxel n tqerɛet-nni. Acu kan, yegla-d s tugdi meqqren ɣer yinelmaden imi ur zrin ara ansi i d-yekka ṣṣut-nni. Tugget deg-sen nnan-d belli di tazwara nwan d lbumba i yeṭṭreḍqen . Inelmaden akked wid ixeddmen deg ugezdu, mi slan i ṣṣut-nni yeffeɣ-iten laɛqel fɣen-d ɣer berra s lemɣawla d ayen i d-yeglan d ɣelluy n waṭas deg sen. Ur ɛeṭṭlen ara yiɣalen n usellek wwḍen-d ɣer umkan i wakken ad awin azal n 38 n wid ifesxen, tugget deg-sen d tiqcicin .
S. Yamani