Taɣiwant n Uqbil d yiwet n tɣiwant gar tɣiwanin n Ain El Hammam, mazal teṭṭef deg leɛwayed n tjaddit , d yidles n tmaziɣt. Tesɛa ṭam (8) n tudrin. Gar tudrin-is, ad naf taddart n Wat Ṣellan i d-yefkan Ferḥat Ait Mouḥend, d yiwen n unelmad n Mouloud Mammeri. Yekker-d deg yiwet n twacult taqbaylit, baba-s d yiwen umǧahed ameqqran iwumi qqaren si Wakli, yemma-s Jeǧǧiga At Yusef. Yella gar yimezwura yennuɣen ɣef tmaziɣt netta d yimeddukal-is,Nour Ould Amara d wiyaḍ. Nuḍḥen akken tamaziɣt ad teṭṭef adeg i as-ilaqen. Iswi-nsen, ad tili d tutlayt tunṣbt. Yeselmed Ferḥat Ait Mouḥend deg sin yiɣerbazen : aɣerbaz alemmas Amar At Chikh, d uɣerbaz alemmas n Waɣzen deg Ain El Ḥammam, acku imir ulac iselmaden n tmaziɣt, dɣa yettawi yettara seg uɣerbaz ɣer wayeḍ, awi-d kan tamaziɣt ad teǧuǧǧeg. Iḥemmel aṭas acennay-nneɣ ameqqran Maɛṭub Lwennas. Yekcem deg ukabar n RCD deg useggas (1994-1995), akken bdan ijeǧǧigen n tmaziɣt fettun almi d-tusa lmut tqeccem-iten. Ferḥat yewweḍ leɛfu n Rebbi ass n 26 deg ɣuct 2014, sin yiseggasen-aya i aɣ-yeǧǧa. Yenneɛtab s yiwen waṭṭan ur nḥellu almi yegla yis-s. Akka yettwamḍel deg taddart-is At Sellan. Usan-d ad ɛezzin tawacult-is seg yal tama Lmut-is qqerrihet, maca ayen qerriḥen s waṭas , d gma-s Massinissa yenɣan iman-is yerna yella d amezwaru deg leqraya-s asmi d-yewwi akayad n bem deg useggas 1998 yesɛa 19 /20, yewwi-tt d amezwaru deg Ain El Ḥammam ; yerna yemmut baba-tsen mazal ttun tiyita terna-d tayeḍ, tiyita taneggarut d lmut n Ferḥat , ad d-yazen Rebbi sber i twacult-is , tajmilt tuɣal-as ilindi d useggas-a s trusi n yijeǧǧigen ɣef uẓekka-s, ad t-irḥem Rebbi
Zakia Ben yahia