Tasqamut n taddart akked tiddukkla tadelsant n taddart n Ait Abdelmouméne, suddsen-d ass-nni n lǧemɛa 19 maggu akked wass-nni n ssebt 20 maggu, yiwet n tejmilt meqqren i yiwen umeɣnas n tmaziɣt i lmend n umulli wis sin n tmettant-is, wagi d Ahcène Taleb n taddart n Ait Abdelmouméne. Yella-d leqdic-agi deg uɣerbaz amenzu n taddart-agi, ɣef teɣzi n sin wussan. Ma d ahil yettwaxdamen yella-d akka: ass-nni amezwaru, yella-d deg-s temsikent n ttsawer d yimagraden n tɣamsa akked usenzi s ubuddu n udlis yura uqbel ad yemmet, yefka-as azwel n “Ait Abdelmoumène, repères historiques”. Syin d iremad idelsanen i d-senɛet Tiddukkla tadelsant ilmeẓyen n usiren. Tella-d diɣ temsizzelt di tmaziɣt tewwi isem n Ahcène Taleb, ɣer taggara n wass, yella-d usenɛet d turart n kra n leṣnaf n waddalen sɣur Tiddukkla tanaddalt JSK Karaté. Ma deg wass-nni wis sin, tasebḥit n wass, yella-d usersi n tmeqqunt n yijeǧǧigen ɣef uẓekka-s, syin meslayen yimawlan-is d yimeddukkal-is fell-as, syin akkin d lwaɛda n tgella i wid iḥedren dinna. Ma deg tmeddit n wass, tella-d yiwent n terbaɛt n ccna n warrac imecṭaḥ n Tiddukkla tadelsant Ilmeẓyen n usirem, llant-d diɣ tnagiyin ɣef tudert-is d yimuhal-is. Turart n yiwet n tmezgunt tameẓyant sɣur Tiddukkla tadelsant Ilmeẓyen n usirem dima, ɣer taggara n wass tella-d tukci n warrazen i wid i d-yufraren deg temsizzelt-nni n tmaziɣt yewwin isem-is, d tukci n yigerdasen n uttekki i wid yettekkin deg tejmilt-agi.
Adaoun Abdelghani