Seld mi d-tekcem tefsut, yecreq-d yiṭij-is aqesḥan, yesɣar akal d yimɣan, yusa-d deg wayyur-a-ines n mayyu, lawan n tuddma n umger i lqerḍ. Imi aql-aɣ deg wayyur aneggaru n tsemhuyt-a, ḥeḍru-d ad d-yaweḍ unebdu, walan yimezdaɣ n usamar n Bgayet, gar-asen wid n temnaḍt n Ayt Smaɛel d tuddar tiǧartin am Rrif, Talaɛṭa d Kefrida, yessefk fell-asen ad lhun d ccɣel n tmegra uqbel ad ifat wakud-is. Acku, lqerḍ-nni ẓran-t yemɣi-d yeɣzif, yewriɣ, ihegga i tukksa. Rnu, seg tama-nniḍen, llan wid i iɣiwlen deg-s imi nwan ad frun leqdic-is send ad d-kecmen wussan-a n wayyur n remḍan. Imi leɛtab n tmegra n walim-nni iban yettiwɛir ugar deg tseɛtin n wuẓum, mi ara ixeddem yiwen netta yelluẓ neɣ yeffud. Ladɣa, ma yettuḥettem, ad yemger ddaw lḥamu n tafukt i iḥerrqen. Dɣa, skud aseggas-a irew, yefti lqerḍ s waṭas, mazal ar ass-a kra n twaculin ttbekkirent tasebḥit i tmegra send ad d-yecreq yiṭij, ttuɣalent tameddit mi ara tɛeddi tafukt kra n yimukan, ad tili tili. Ma d wid i yesɛan drus n tferkiwin ideg yella walim, kksen yakan amgar imi yeshel ccɣel-is. Yuɣ lḥal, ula d tamegra n wayen niqal yettwazerɛen, am temẓin, ajilban d yimɣi n bu leqrun, tusa-d deg yiwen n wakud akked tin n lqerḍ. Ad yeqqim leqdic-a d win yelhan seg zik, acku ad yesfaydi seg-s uɣersiw, ad yernu umdan ad yaf abaɣur deg lmal-is.
Kaisa Khalifi