Deg wussan-agi yezrin i d-yeffeɣ udlis n umaru ameqqran d uselmad n tesdawit Mass Moussa Imarazene, iwumi isemma “Awfus n jerrumt n teqbaylit” ( taseddast), i d-yeffɣen ɣer tezrigin « El Amel » deg n temdint n Tizi Uzzu. D wagi i d adlis wis ṭam (08) ara d-yessuffeɣ uselmad-agi n tmaziɣt, ideg i d-yura 46 n temsirin n tseddast taqbaylit. D adlis ara iɛawnen inelmaden n tesnawit d wid n tesdawit, ladɣa wid yeqqaren tamaziɣt. D adlis n 78 n yisebtar, yettnuzu deg tnedlisin s wazal n 250 da. Ad d-nesmekti belli, amaru-agi yewwi-d agerdas Doctora deg tmaziɣt deg useggas n 2007, d aselmad n tesdawit deg ugezdu n tmaziɣt deg tsedawit n Lmulud At Mɛemmer n Tizi Uzzu. Yura yakkan sebɛa n yidlisen gar-asen : timɛayin n Leqbayel deg useggas n 2007, awfus n tseddast n tmaziɣt deg 2007, timɛayin-nni 2016, tanmegla n waddad deg tmaziɣt. Taɣuri igerrzen i yimeɣriyen, afud iǧehden i yimeskaren
A. A.