Deg wussan-agi yezrin i d-yeffeɣ wammud n tmedyazt amezwaru n Mass Salim iwumi isemma “Ulamek” i d-yeffɣen s lmendad n Tsebeddit takanadit n tmaziɣt “Tiregwa” yellan deg tmurt n Canada. D wagi i d adlis amezwaru ara d-yesuffeɣ umedyaz-agi ilemẓi. Gar yisental, iɣef i d-yewwi awal deg udlis-agi n 36 n yisefra, ad naf : tamussni, amɣar azemni, lebɣi, tayri , asirem, Bgayet, tamurt, tirga, tatut, akukru, awal…atg. Ad d-nesmekti belli Salem Benkhlifa, ilul ass 29 maggu 1986 deg taddart n Yickaben deg lɛerc n yimellaḥen, yefrur-id seg twacult n umedyaz ameqqran Si Lbacir Amellah. Yura aṭas n yimagraden deg Uɣmis n yimaziɣen n La Dépêche de Kabylie, yerra-d kra n yiḍrisen ɣer teqbaylit n yimura meqqren yecban : Kateb Yacine, Nizar Kebbani, Djebran Khalil Djebran…atg. Iḥella-d aṭas n warrazen deg tfaskiwin n tmedyazt, ama deg Bgayet, anida yewwi sin warrazen n umḍiq amezwaru deg tfaska n tmedyazt n Udrar n Fad deg useggas n 2012 akked 2013. Yewwi daɣen sin warrazen deg Tizi Uzzu, yiwen d arraz n Cherif Kheddam n tiddukkla tadelsant « Si Muḥend u Mḥend d Yusef u Qasi » deg useggas 2011, akked warraz wis tlata dima n tiddukkla-agi deg useggas n 2012. Taɣuri igerrzen i yimeɣriyen, afud iǧehden i yimeskaren!
Adaoun Abdelghani