Aggur n Ṛemdan n useggas-a, yemgarad γef wid n yiseggasen yezrin γer yimezdaγ n Tubiret. Acimi ? Tiririt mačči d tin ara inadi umdan anda-nniden, maca d tin i tezzin yal tameddit deg Uxxam n yidles Ali Zamoum n temdint-a. Yal tameddit, mezzi, meqqer, d argaz d tameṭṭut ttaγen abrid srid s axxam-a i wakken ad ẓren inaẓuren i iḥemlen. Seg yal ahric n tzuri, idles azzayri s umata, amaziγ beddemma, yeffeγ-d s wudem unṣib seg ukbal i t-yedlen d iseggasen-aya. Ass-a, tiṭ ad tezzi γer wid yellan deffir cγel-a, d imḍebbren yerran gar wallen azal n yidles. Segmi i teṭṭef amkan s yisem-is d tanemhalt n uxxam-a n yidles, Massa Saliha Cherbi, ur teγfil γef wayen ttrajun yimezdaγ n Tubiret. Tebda-tt akka s yinaẓuren imaynuten, ilmeẓyen, almi tessali aswir γer tgejdit n ccna n teqbaylit Lounis Ait Menguellet i d-yerzan ddurt iɛeddan γer Tubiret anda yexdem tameγra s wazal-is. D ayen yefkan afud meqqren i tmehla n yidles i wakken ad teddu deg ubrid-a, imi di taggara n yimalas-a, d Akli Yahiaten i yettwanecden γer Tubiret anda yemlal d tsuta n yiseggasen n lḥers, d tagnit daγ anda ilmeẓyen n twilayt-a, tettunefk-asen tegnit ad mlilen d yinaẓuren iqdimen. I wass n lğemɛa, d Lhasnaoui Amectuh i d-yerzan s terzeft n « La maison blanche » neγ ahat « Fadma » i d-yesmektayen Ccix Lhasnaoui. Ahil n tenmehla n yidles d win ara ikemmlen alamma d taggara n waggur n Ṛemdan, imi axxam n yidles yessewjed yiwet n tmeγra anda ara cnun sin n yinaẓuren n twilayt Moh Dahak d Kamel Chennan. Sin n yinaẓuren-a, ttwasnen ladγa gar yilmeẓyen i ten-iḥemmlen mačči d kra, imi d wid i d-yettarran tiγri yal mi ara ten-teḥwiğ teswiɛt. D ayen yeğğan imḍebbren n Uxxam n yidles Ali Zamoum, ɛetben mačči d kra i wakken ad d-gen imukan i yilmeẓyen. Mi d-nebder akka tukci n wazal i yidles, iwulem ad d-nebder dakken deffir Massa Cherbi yella yimdḍebber amenzu n twilayt Mass Mouloud Chérifi i d-yellan di lmendad i tnemhalt-a iwumi i d-ibeggen lebγi-s i lemɛawna i wakken aḥric-a, ur yettγimi ara di rrif, ur ttafen ara yimdanen tagnit i tukksa n lxiq, daγ ad idiren akked yidles-nsen, acku agdud ara yerren di rrif idles-is, tiggrat-is d nnger.
M. S.