Simmal izerri wakud, trennu tutlayt taqbaylit tesbeggin-d iman-is, tetteṭṭef adeg-is deg tmurt. Aya, iban yekka-d sɣur tarwa-s i tt-iḥemmlen, i tt-iteddmen imi ẓran d acu d azal-is ameqqran i tesɛa deg tudert-nsen. Assa, tutlayt ur tt-nettaf kan deg uɣerbaz, deg yidlisen, iɣmisen d yiẓeḍwan inmettiyen. Mačči anagar iselmaden, inelmaden, imura d yimedyazen i tt-yettarun. Maca, ula d Izwawen-nniḍen, kecmen deg unnar n useqdec-is s wudem i as-ilaqen. D ayen i yexdem dɣa Mass Tufiq Ɛ, yiwen n urgaz seg Bgayet, ussan iɛeddan, mi i d-ihegga tikarḍiwen n yinebgawen (cartes d’invités) i lmend n tmeɣra n yelli-s. Yura deg-sent awalen n uɛraḍ s yisekkilen n tutlayt n Lmulud At Mɛemmer. D tigawt igerrzen i yexdem seg wul Mass Tufiq Ɛ, iɣef yemsefham akked twacult-is, zdin tikti gar-asen. Tikarḍiwin-nni, ɣas ma llan ur tent-rǧan yinebgawen, ad tent-afen ttwarunt s teqbaylit, meɛna umren yis-sent ayendin imi teṭṭef tutlayt-nsen deg-sent amkan-is deg umkan n tutlayin tiyaḍ i nnumen qqaren-tent deg qeddac n yidigan. ZRray-a i iga Mass Tufiq Ɛ d wid yeddan yid-s, yessegzay-d leḥmala-nsen i tutlayt taqbaylit, d usirem i sɛan deg-s. D asurif ara yeǧǧen Iqbayliyen-nniḍen, ad d-akin seg tɣeffalt, ad d-mmektin, ad sqedcen tameslay-nsen di yal taɣult akken ad tettwaḥrez nettat, ad rnunt tmagit d tnaslit. Imi tutlayt teḥwaǧ arraw-is.
Kaisa Khalifi