Yal ass d ccfawat, d asmekti…n widen i ɣ-teccelqef tmettant. Wa iṛuḥ d isegmi aleqqaq, wa iṛuḥ d asfel i tegrawliwin n liser, d asfel i tlelli ara yessidren tugdut. Wa nenɣa-t s ukuffir, wa nerra-t di rrif, yessen naɣ ur yessin, kif kif. Maaaaaacahu ɣef ubrid yessawnen yettawin ɣer tmurt n wakal d idammen, d ussan n tefsut, tafsut n tegrawliwin, di tmurt n leqbayel… Macahu ɣef useklu yegman s isegmi aleqqaq deg ubrid n tewrirt yettwattun, abrid yettawin s adrar n Baya, adrar iḥeddren i ttar, winna yessazzalen idammen n yimecṭuḥen. Macahu ɣef weblaḍ, ɣef lyasmin, ɣef uɛeqqa yessawalen yettselliken si nnger “menyif ad negrent tudrin wala ad yengar laṣel”. Amek ara msefhamen sin, ma d uɛwij wis tlata? Di tlata i nnejmaɛen ad sduklen leɛrac, ad d-ɛetqen leṛwaḥ di Lezzayer n wass-a.
Mdel tiṭ ad yader ccfaṛ, lezzayer akin i tlisa, d asif n yidammen, akad i tlisa d talafsa. Wa ineqq, wa iḥeggu, wa yettṛaju ass-is, wa yesgunfa, wa yellez, wa yennejla… tajewwaqt n leḥzen, tiɣri n laṣel, tilelli s idammen, tasa-w turew-d asemmiḍ…
Zira