Tanmehla n yidles n Tizi Uzzu akked Usqamu Aɣerfan n Lwilaya ( APW) n Tizi Uzzu, s tallelt n Uxxam n yidles Mulud At Mεemmer n Tizi Uzzu, s lemεawna n Uxxam n umezgun amniḍan Kateb Yacine, suddsen-d ussan n umezgun wis 8 gar 5 d 7 deg duǧember 2016 anda gan timsizzelt tis tlata n tmezgunt Muḥya n uwreɣ I yuran s tmaziɣt. Ass-nni n ahad 7 deg duğember 2016, i d-banen igemmaḍ n temsizelt-agi umezgun n Muḥya deg Uxxam n umezgnu amniḍan Kateb Yacine n lwilaya n Tizi Uzzu. Tella-d tukci n warrazen i tlata n yiḍrisen i d-yufraren deg temsizzelt-agi. Yufrar-d uḍris n “Faḍma” n Nait Sidnas Mohend Larbi n taddart n Tifilkout, d netta i yewwin arraz n Muḥya n uwraɣ, s lqidar n 300.000.00 DA. Ma d arraz n lfeṭṭa yewwi-t Amran Salem s wazal n 200.0000.00 DA. Ma deg umḍiq wis tlata d win n udrenz (Bronze) s wazal n 100.000.00 DA isaḥ-d Sakhi Arab. Tella-d tmeɣra-agi n taggara s tilin n waṭas n yiwudam, ama d tawacult n yidles ideg tella Massa Gouméziane Nabila d tanemhalt n yidles, d Mass Farid Mahiout d anemhal n uxxam n umezgun Kateb Yacine. Llan daɣen watmaen n Muḥya Mohamed d Mouloud, am wakken diɣen llan yiwudam n tsertit yecban: Ouahab Ait Menguellat, aselway n tɣiwant n Tizi Uzzu, d uɣella n ladayra n Ath Yanni…atg. Ad d-nesmekti belli ttiεad-agi, yella-d ass n 6 d 7 deg duğember 2016. Ma d asrusi n yiḍrisen n umezgun yettekin deg temsizzla-a, sersen-ten imawlan-nsen uqbel n 24 deg Unbir iεeddan. Yella-d usersi-nsen ama deg Tenmehla n yidles d Uxxam n yidles Mulud At Mεemmer neɣ deg Uxxam n umezgnu amniḍan n lwilaya n Tizi Uzzu. Ilul Mass Muḥend u Yeḥya s yisem-is n ṣsaḥ Abeddlah Mohia, ass n 01/11/1950 deg Yiεezzugen, yemmut ass n 7/12/2004. Yettuneḥsab d ababat neɣ d tigejdit n umezgun s teqbaylit. Gar wayen i d-yeğğa deg umezgun nezmer ad d-nebder: Si Nistri, Tacbaylit, Muḥ n Muḥ…atg. Ma d ass-nni n lğemεa tasebḥit n wass, yella-d usersi n tmeqqunt n yijeğğigen ɣef uẓekka-s, yellan deg At Rbah deg tɣiwant n Iboudraren.
Adaoun Abdel Ghani