Win iɛetben yettnall id yeqqar wanzi. Lemtel id newwi yebna ɣef llsas werǧin yeskaddeb–it lawan. Ayen id wekkden ɣef tidet n wawal-agi d ayen nettwali deg annar n usnulfu adelsan ɣef kra n yelmeẓyen n tmurt n leqbayel. Taḥejjurt ɣef tayeḍ, asɣar ɣer wayeḍ iswi yellan d awezɣi yettuɣal d d tilawt. Gar isalen yessefṛaḥen nezzeh d afran u usaru n Reda Amrani «mi ara d ḥekku targit» akken ad yettikki deg tafaska t-is tesɛa n isura n tmaziɣt ara d yilin di tmurt n Lmaruk deg tamdint n Agadir deg tettili timsizelt ɣef warraz “ Isni n wewṛaɣ” . Tafaska-agi ara idumen azal n xemsa n wussan ( si 2 unbir alamma d 6 unbir 2015) d ttin deg ara ttikkin aṭas n isura( ama d isura iweẓlalen neɣ d isura ɣezzifen) id yekkan si yal tama n tmurt n tmazɣa . Tadwlit-agi t-is 9 a ttili diɣen d tajmilit i umsufeɣ amaruki Hakim Belabes akked tamsufeɣt tatunsit Salma Baccar. Ɣer tama n tfaska-agi aṭas n isurag ara yilin akken ad sefrurin liḥala deg yella sinima amaziɣ s-umata . Mačči kan d-aya, imi asaru n Reda Amrani: «mi ara d ḥekku targit» yettwafren diɣen akken ad yettikki di tadwilt tamezwarut n tfaska tagraɣlant n Sinima Amaziɣ n temdint n Casablana dima di Lmaruk . Tafaska agi ula d netta-t a tt-dum azal n 5 wussan ( si 6 alamma d 10 deg aggur n unbir). Xudi Reda Amrani yelha amecwar deg aḥric-agi n sinima. Asaru- ines : «mi ara d ḥekku targit» d tajmilt i sin icennayen n tmurt n leqbayel Slimane Azem akked Salah Sadaoui. Leɣzel n usaru yebna ɣef taqṣit n yiwen weqcic “Fahem” id yekran gar tawacult n inaẓuren. Bab-as yella ixeddem timesllalin ( marionettes) yerna ixeddem ticqufin s teslatin –agi n usɣar i warrac imecṭaḥ. Bab-as n Fahem yeffer ɣef mmi-s yak ayen-nni. Yiwwas (deg ass n umulli-ines) Fahem ad yeldi tawwurt iɣelqen ( tazeqqa anda ixeddem baba-as timesllalin-nni) dɣa ad yedlu ɣef tidet yellan. Di ccaw ad yekcem tizrugin n tirga, tirga ara t-yawwin tmurt inaẓuren. Din ad yemlil akked tigejda n ccna n teqbaylit am Slimane Azem akked Salaḥ Sadaoui.
Ait Slimane Hamid