Mebeɛd timeɣriwin n unebdu, ama d tid n yimdanen neɣ n tɣawsiwin : tameɣra n lfeṭṭa, tameɣra n uẓeṭṭa, tameɣra n talaxt, tameɣra n tqendurt n leqbayel, tameɣra n tbexsisin, n tkermusin, n zzit, n tamamt…tamurt n leqbayel, tuɣal, kra yekka unebdu, d tazeqqa n tmeɣriwin (Salle des fêtes). Yezha win ixaqqen, yekker zhir deg yal tama n tmurt, tekker ddunit ad telḥu. Tefreḥ tmurt meqqar, teɛya deg leḥzen d umennuɣ i yeddlen tudert-is.
Tikkelt-a, d imezdaɣ n yixelwiyen tama-agi n wagennun i igan tameɣra n Rebbi. Acu kan d tameɣra n Rebbi mačči i Rebbi. Tameɣra-agi, tella seg zik ɣer leqbayel, acu kan yal tama melmi i tt-txeddem. Llan kra, xeddmen-tt smana uqbel timecreḍt n ḥartadem, llan wiyaḍ xeddmen-tt azekka-nni n tmecreḍt.
Deg tama-agi n yixelwiyen, xeddmen-tt ddurt uqbel timecreḍt. Xedmen-tt ddurt iɛeddan. Ihi, ass-nni n tmeɣra n Rebbi i ttemlilin Wat taddart deg lǧameɛ i wakken ad mmeslayen u ad d-heggin timecreḍt (lewziɛa, deg kra n tamiwin). Ad walin acḥal n yizgaren akked yidrimen i asen-ilaqen i wakken ad d-aɣen izgaren i ara zlun deg tmecreḍt ara yilin ddurt-nni i d-iteddun. Akka, dɣa, i d-tella tmecreḍt-nni sman-agi anda i zlan 13 n yizgaren ara ferqen ɣef 805 n tesɣar.
Deg tmeɣra n Rebbi, ttnawalen seksu i ttawin ɣer umekkan unejmuɛ, zik ɣer tejmaɛt, tura ttawin-t ɣer lǧameɛ. Akka, Ixelwiyen mazal ṭṭfen deg leɛwayed n tjaddit, leɛwayed iẓeṭṭen tagmat mačči d tid i ten-iferqen akken i bɣan kra ad xedmen : ad d-awin leɛwayed n wiyaḍ s yisem n Rebbi. Akken i as-yenna Ait Menguellet ‘’Ula d Rebbi d ayla-nsen’’. Ihi, akka i d-sbanen Wat Wagennun d akken ula d nutni ttalasen deg Rebbi u rran-as ‘’tajmilt’’. Ayen yelhan, yelha.
Llant kra n tamiwin, ad xedmen lewziɛa, azekka-nni d tameɣra n Rebbi, selazekka-nni ad kkren yifellaḥen ad bdun tayerza.
Hocine.M