Deg wass n 30 yunyu yezrin i d-yella umsegraw s wudem unsib ɣef tlalit n tiliẓri tazwawt tamaynut. Temmug temlilit-a n uberreḥ deg Canada gar wid akk i d-yessekren tikti n usenfar-a akked kra n yimeɣnasen d yineɣmasen. Iɛeggalen n termist-a TQ5, ɛeddan s nnuba sdat uzayez i iḥeḍren akken ad d-ssegzin iswiyen n usenfar d wayen akk icudden ɣur-s. Imi iqeddicen imenza, bdan yakan setta n wayyuren yakan. Ɣef wakken I d-nnan, ad yettwasbedd uxxam n tiliẓri-a tazwawt deg Montréal, tamdint yakk tameqqrant deg Canada deffir Toronto. Am wawal n unemhal amatu n termist-a Mass Saleḥ Swami i d-yemmeslayen tazwara ɣef tikti, i d-yenna d taqburt imi yal azwaw yessaram ad yesɛu tiliẓri d tazwawt 100%. Yenna-d, ilaq-asen ad qennɛen lɣaci, ad kkin s tikci n tedrimt akken ad yili wamek ad tbedd tiliẓri-a aseggas i d-iteddun 2018. « Ur nelli d takebbanit i usefti n tedrimt. Nekni d tarbaɛt tusligt. Maca isuḍaf n tmurt n Canada, ḥettmen-d ad d-iɛeddi yiwen seg kra n tiddiyin tideblanin». D kra seg wayen i d-yerna Mass Sawmi ɣef usnulfu n termist Taqbayllt TV. Mass Sawmi, isenned ɣef uḥraz n timunent n tiliẓri-a akked uwenneɛ n wahilen-is deg wakud. Ma yella d Mass Racid At ɛli Uqasi, imkellef s teywalt deg termist-a, yewwi-d awal ɣef wazal n tiliẓri-a d yimihiyen yellan, ma teqqim akka ddeɛwa. Dɣa nesteqsa-t ɣef wanda yewweḍ usenfar, yerra-aɣ-d: « Tura aql-aɣ deg usurif wis sin n usbedd n usenfar-a. Ad nessiwel ad d-nejmeɛ tadrimt n wazal n 450000$ sya ɣer duǧember, swayes ara d-naɣ agensa ɣef kraḍ n yiseggasen ». Ilmend n waya, “Tettwager ihi tiɣri i Yizwawen anda ma llan ad kkin s tedrimt, neɣ s tuɣalin d anaful (actionnaire) deg usebded n tiliẓri-a, tamezwarut deg umezruy ara yilin d taqbaylit 100 %”. Ikemmel yenna.
M. K.