Tuɣal tberḥ-d ussan-agi iɛeddan tneɣlaft n usegmi aɣelnaw Mass Benghabrit Nouria, belli ad ad tili tegnit tis snat i uɛiwed n ukayad n taggara n uswir n tesnawit, yettwasnen s yisem n BAC, seg 13 alamma d 17 deg waggur-agi ideg nella, mebɛed mi d-tenna aniqal deg wussan imenza n waggur n cutenber. Leḥsab n wid ur nesɛeddi ara akayad-agi deg lwilaya n Tizi Uzzu, yewweḍ ɣer 2 558 n yisnawiyen, alaḥsab n yisallen ineggura i d aɣ-id-yewwḍen seg Tenmehla n usegmi n lwilaya-agi. Gar 2 558 i izeglen akayad-agi, llan deg-sen 392 n yinelmaden iɣurbizen (wid yeqqaren deg tesnawit), ma d leḥṣab n yinelmaden imunan (ileliyen) yewweḍ ɣer wazal 2 166. Inelmaden-agi, ad ɛiwden, ad sɛeddin akaya-d-agi deg 9 n wulmisen n yikayaden, yellan deg tlemmast n temdint n Tizi Uzzu, am wakken daɣen ara d-ilin ɣef lmendad-nsen wazal n 1 000, gar yiselmaden akked yimɛiwen n usegmi. Ma ttiɛad n tririt n yigemmaḍ, ad d-yili sya ɣer taggara n waggur-agi, ama i wid i sɛeddan tikkelt tamezwarut i d-yellan gar 11 alamma 15 seg yunyu iɛeddan, ama i wid ara i sɛeddin deg tegnit-agi tuzzigt ara d-yilin seg wass n lexmis d afella.
Ghani Amazigh