Lemɛinsla, d ansay aqbur i mazal deg tmurt n Leqbayel ar ass-a. Yal mi ara d-yaweḍ wass n 7 deg yulyu, ad siɣen yimdanen times deg yiɛerqab-nsen neɣ deg yiqwiren-nsen. Ad d-jemɛen asaɣur akked wafrasen, ad rnun ɣur ticcict, syin ad asen-sekkren times. Ttgen lecɣal-a tasebḥit, ma yella deg umekkan n tneqqlin akked tzemrin, ma yella deg usuki neɣ umḍiq kan akka n menwala, ttecɛalen times-nni, tameddit. Ɣef wakken ttxemmimen yimezwura, nnan-d abbu n tmes-agi, yelha d ddwa : yessenqas deg uqerquc, meḥsub yettarra-t ad yaweḍ d tabexsist ; yessufuɣ-d ibeɛɛac izedɣen daxel n lfakya u yesnernay tilin-is. Ma ɣef wansi i d-yekka wansay-agi, ad naf gten turdiwin. Tamezwarut, teqqar-d d akken Lemɛinsal neɣ Lɛinsla d isem n tgeldunt i yefɣen i ubrid deg uḥric n tnefsit, syin kkren yimezdaɣ, jemɛen-d taffa tameqqrant n usaɣur akked yiqeccuḍen, rran-tt ɣer daxel u mekknen-as times. Yuɣal wabbu-nni d asigna, s kra n tejra i yennul, tefka-d lɣella dayen kan mi i tt-qernen ɣer tin ur iḥuzi ara wabbu-nni. Ihi, seg yimir, xeddmen Lemɛinsla. Turda tis snat, tenna-d d akken ansay-a, icudd ɣer yiwet n tgezzant neɣ taseḥḥar (Une sorcière) i yesɛan lǧehd meqqren. Ihi, mi temmut, bɣan yimezdaɣ ad sdummen lǧehd-agi-ines u ad t-ǧǧen am lḥerz. Ma turda tis tlata, tesɛa assaɣ srid akked umulli n tmettant n tgellidt Dihia. D asmekti n userɣi n yigran sɣur imnakcamen iɛraben n lweqt-nni. Seg yimir, ttgen yimaziɣen times d asmekti i umulli n tmenɣiwt n Dihia. Ula d acḥal n wassan i tesɛa Lemɛinsala, ur iban ara : kra qqaren-d, tetteṭṭaf kan yiwen wass ; wiyaḍ tettdummu smana kamel ; llan ɛad wid i d-yeqqaren , tettɣimi ɣef leḥsab n tallit. Akka yebɣu yili lḥal, aṭas i mazal xeddmen Lemɛinsa, ladɣa deg tmurt n Leqbayel, xas ulamma yemgarad wamek i ssaɣayen times d wayen ttgen ass-nni n Lemɛinsla. Deg taggara, llan wid i d-yessuddmen ula d amyag seg yisem-agi Lemɛinsla imi qqaren « Semɛinsel », neɣ iɛunsel, meḥsub yewweḍ d ameqqran yisegmi, iɛedda i uleqqem.
Hocine Moula