Imezdaɣ n taddart n Aḥnif, widen iwumi ttwakksent tferkiwin mi akken iɛedda ubrid ameqran Asammar- Amalu, gren tiɣri I lwali n Tubiret ilmend n maḥyaf i ttqabalen. Imdanen-a, iwumi yettwaṛeggem lexlas n wayen i asen-iruḥen deg usenfar-a, ur dmin ara belli tadrimt ara d-awin d tin yecban tin i asen-d-yettwaheggan. Di tmuɣli nsen, azal n tferka, neɣ tazemmurt yettwaqelɛen d win i ilaqen ad yili almend n teswiɛt ideg yettidir umdan tura. Ugin ad qeblen ssuma yellan seg zik, tura mi akken zzit n uzemmur tewwed ɣer 350 n yidinaren, d wakal yettnuzun s wazal n ɛecrin alef n yidinaren i yiwet n lmitra.
Tiferkiwin-a yettwakksen i yimdanen, tid ara yilin d imukan n usgunfu i yimsibriben, sseglant-d s uqlaɛ n waṭas n tzemrin d tleqqamin, am waken daɣ i llan lebyur iwumi uɣalent tidima, ur zmiren ara yimawlan nsen ad ten-sxedmen.
D ayen i yeǧǧan imdanen i tḥuza taluft-a ad ssutren seg yimḍebber amezwaru n twilayt iwakken ad yessali ssuma n tzemmurt ɣer xemsa n yimelyunen n ssantim, taleqqamt ɣer sin n yimelyunen n ssantim, d lbir ɣer 200 n yimelyunen n ssantim.
Nnig n waya, bɣan daɣ yimezdaɣ-agi ad sfaydan s yiwen n usenfar n lebni ara ten-yesdukklen.
Sylia. M