Deg wussan-agi yezrin i d-yeffeɣ udlis amaynut n tmarut d tmedyazt Massa Sadia Bounadi iwumi tsemma “Macahu s usefru 1” d taḥkayt n temqerqert akked tifirɛqest, i d-yeffɣen ɣer tezrigin n Aframed. D wagi i d adlis wis tlata ara d-tessuffeɣ tmedyazt-agi tilemẓit. Yettnuzu s wazal n 150DA, deg-s 32 n yisebtar. Aḍris-agi n tmacahut n temqerqert d tifirɛqest, yella yakan deg timawit s tewsit n tesrit, ma d Sadia Bounadi, tamezwarut, terra-t-id ɣer tira, , tis snat terra-d s lmizan n usefru, tis tlata terna-as-d unuɣen i icebḥen aṭas. Iwudam n teqsiḍt-agi d tifirɛeqest akked temqerqert. Ad d-nemekti belli Sadia Bounad, tlul deg taddart n Rafour deg lwilaya n Tubiret. D tamarut n sin yidlisen-nniḍen : Lxir n Uxellaq deg 2009, i d-yeffɣen ɣer tezrigin n Usqamu unnig n timuzɣa (HCA). Syin akkin terna-d adlis-is wis sin Gar yiḍelli akked wass-a, i d-yeffɣen ɣer tezrigin dima n HCA. D taselwayt n Tiddukla « Iswi » yesseḥbibiren ɣef tgemmi d yidles. Tura akka, ha-tt-an la d-tettheggi aḥric wis sin n tmacahut-agi ara d-yefɣen deg wussan i d-iteddun. Taɣuri igerrzen i yimeɣriyen, afud iǧehden i yimeskaren!
Adaoun Abdelghani