Wid yennumen ttruḥun, iseggasen iεeddan, di remḍan γer temdint n Tizi Wezzu ad afen tbeddel mačči d izli. Iberdan yettilin ttaččaren s ṭṭunubilat d yimdanen uγalen qrib d ilmawen. Seg wassmi i yettwakkes uznuzu deg yiberdan d usufeγ n ttawilat n usiweḍ (ifurguyen) γer berra n temdint, imesdurar uγalen ur sṭuqquten ara tikli γer temdint. Xas akken tuγal-d lhiba tamdint : ulac lxuf, tenqes tukerḍa, tikli di liser… meεna llan wid yettwalin aya s yir tamuγli ladγa wid-nni yesnuzun lxeḍra d lfakya. Yal ass ara d-ilalen, ad d-yili ujdid seg lğiha-nsen imi tteεraḍen yal tikkelt ad d-uγalen γer yimekwan anda ttilin zik, acu kan imḍebbren n lwilaya ur ten-ttağğan ara. « Zik di remḍan ur tezmireḍ ara ad tembiwleḍ di temdint : ččuren yiberdan d sselεa. Ad tafeḍ ayen tebγiḍ. Tura ula d leḥcic n ccerba yeγba. » Akka i tesḥassef yiwet n tmeṭṭut. « Akka i tella temdint di leftur-nni, ur yili d acu ibeddlen. Yella kan ciṭ-nni n lxilaf deg yiḍ imi d-yettili ccna deg uxxam n yidles Mulud Mεemmri. » Ikemmel yenna yiwen umezdaγ n temdint.
Ma d remḍan di tudrin n leqbayel yecba tayaziḍt-nni n At Belqasem ‘’yiwen n ubrid i tessen.’’ Bexlaf wid yettruḥun γer zyara n yimawlan neγ γer uḥewwes, amur ameqqran ttawin abrid n lqahwa neγ n lğameε. Wid yesεan zher zemren ad d-afen amkan i kra lweqt γer domino uqbel ad tebdu loto. Iseggasen-agi ineggura, ḍewren-tt akk iqahwajiyen γer loto, faqen tesεa tadrimt ugar ayen-nniḍen. Ihi akka aggur kamel, gar uxxam d lqahwa. ‘’Remḍan yuγal d lεada mačči d lεibada’’ i aγ-d-yenna Meqqran.
Hocine. M