Imezdaγ n Tḥemmalt i d-yezgan i taddart n Wizgan, ttidiren yiwet n tezγunt n waman yuεren aṭas deg lawan-agi unebdu acku d aggur n Ṛemḍan anda imdanen uẓamen, akken ḥettmen fell-asen ttefγen γef tiliwa d lebyur, d anadi γef tiqit n waman. imezdaγ n temnaḍt-agi irkeb-iten lḥir, bγan ad-afan tifrat i wugur-agi s lεejlan acku s teγzi n 8 n wussan ulac tiqit n waman deg leεyun n yexxamen.
Tamnaḍt n Wizgan d yiwet n temnaḍt ur nesfaydi ara s lγella n usafar n waman n ubaraj n Taqsebt. Aman i sexdamen ttruḥun-d deg lεinṣar n udardar, ugur meqqren uwezzaε n waman deg temnaḍt n Wizgan yettili-d deg unebdu acku lawan agi ttnejmaεen-d akk imezdaγ n temnaḍt-agi, ayen yugaren 150 000 imezda&gamma,; rnu Lεinṣar udardar ineqqes deg lγella n waman, γef aya xedmen ahil n uselḥu n waman 1/3 neγ 1/4,rrnu tanemhalt n waman n Wizgan txuṣ deg ttawilat akk d ixeddamen.
Aseggas yezrin nnan-d yemḍebren n tmahla n waman n temnaḍt n Wizgan d akken la conduit tamaynut n waman a d-teldin di kra n wussan, d ayen ara d-yeglun s tifrat n wugur n waman. Maca la conduite teldi acḥal wagguren-aya aγbel n waman mazal yedder, yettnarni deg wass γer wayeḍ.
D tidet, tella tmentilt n lexṣaṣ n waman deg temnaḍt-agi, maca ula d tamehla n waman n temnaḍt-agi stahzan aṭas, muḥal beden zdat n wuguren. Ihi imezdaγ n Tḥemmalt, ggren tiγri i yimḍebren εlayen i teεna temsalt akken a d-affen tifrat i weγbel n waman i yedren d iseggasen.
Islam Bessaci