Ha-t-an Remḍan izeggen, meεna werğin i aγ-d-nnan ṭṭfen iğadermiyen, aseggas-a, wid itetten azal. Xas llan yakan wid ur nettuẓum ara : ama d imasiḥiyen ama d wid-nniḍen, acu kan tikkelt-a, ahat, yebra udabu i ṭṭbel deg waman. I usmekti, ilindi εeddan kra n yimdanen di creɛ axaṭer ččan azal. Imdanen-a d imasiḥiyen γef wakken i nnan deg uxxam n creɛ. Meεna asteqsi i yeṭṭfen lwelha n yimezdaγ n tmurt n leqbayel d wa : acuγer d imasiḥiyen kan i ṭṭfen ? Acuγer ur ṭṭifen ara imdanen-nniḍen itetten azal ? Ula d aseggas-a, yella-d usteqsi : i wacu ssusmen γef wid itetten Remḍan ? Mačči s tufra i tetten neγ uẓamen akk medden imi llan imekwan i tteldin tiwwura-nsen i lmakla si sbeḥ alamma yedden ccix. Σlaḥsab n yisallen i aγ-d-yewwḍen, nnan-d d aberri kan i ttbarrayen srabes n laman deg wid itetten ; ur ten-ttawin ara. Γef wakken d-nnan,dγa, di smana-agi iεeddan kecmen srabes n laman γer yiwen umekkan anda i ufan imdanen tetten, kksen-asen lekwaγeḍ. Ciṭ kan akka armi d-yeččur umekkan-nni d lγaci am wakken d timesbanit. Imir kan rran-asen lekwaγeḍ, meεna berran deg-sen.
Hocine. M