Aɛmer yunag meẓẓi ɣer lɣerba. Yewwi-t umɣar n baba-s Meẓyen, iserwel-it si tmurt di lgirra-nni yugad ad t-yawi uṛumi ɣer lɛesker neɣ ad iddu d yimjuhad. Ayen tekka lgirra ur d-yekcim tamurt. Iwwet sebɛa snin ɣef ubeṛdi.Yelmed lḥirfa n lebni, ibennu, ixeddem deg icenṭiyen. Tefra lgirra yezzi-d ɣer tmurt, izweǧ d yelli-s n ɛemmi-s Faḍma. Iqqim azal n tlata n wagguren dɣa yuɣal ɣer lɣerba. Iwweḍ kan ibda axeddim deg ucanṭi, ibennu. Seg wassen-nni ur d-yezzi ɣer tmurt, la tabrat, la lexbar-is. Nwan akk medden yemmut. Urɛad d-yezzi useggas segmi iṛuḥ Aɛmer yerna ɣer-s uqcic. Semman-as Meẓyen s yisem n jeddi-s iwwḍen laɛfu n Ṛebbi sin wussan kan uqbel ad d-ilal. Akka yiwen immut wayeḍ ilul-d, fkan-as isem n win yemmuten am wakken d aɣram ara t-id ɣermen. Qqaren mi ara d-asent, ttasent-d ɣef tikkelt, ula d Aɛmer deg wussan-nni deg yemmut baba-s i d-yeɣli deg ucenṭi, yerreẓ deg wammas iḥbess ur iteffeɣ ara, iqqim kan di sbitar. Meẓyen tesseker-it-id yemma-s Faḍma s lḥif. Akken ad iɣer ad icbu akk arrac, yemma-s teffeɣ d tamecṭajerṭ ɣer medden… A tta-n teffeɣ ɣer uzemmur, a tta-n ɣer usaɣur… D adfel neɣ d urɣu Faḍma ur tessin laɛfu. Akken iwweḍ d argaz, ifukk leqraya-s di tesdawit, iruḥ ɣer Fransa ad iẓer baba-s. Yiwen n yiminig n taddart-nsen yusa-d ɣur-s yiwen wass yenna-as ma tebɣiḍ ad truḥeḍ ad tezreḍ baba-k ad ak-mleɣ anda yezdeɣ nekk deg wussan-a ad uɣaleɣ ma tebɣiḍ ad tedduḍ yid-i. Idda Meẓyen d urgaz-nni ɣer Fransa, iwweḍ alammi d Paris, imla-as anda izdeɣ baba-s. Meẓyen ur issin, ur iwala baba-s ula di tugna. Ur iẓri amek yegga wala amek ara t-yaf. Iɛzem ad iruḥ ɣer-s imiren kan mi yerkeḍ taqaɛet n Paris. Iwweḍ zdat tewwurt, ibedd, irra-d nnehta, ul-is yekkat amzun d amutur. Iwwet ɣef tewwurt ulac wis-id-yerran awal, wala wis-id-illin tawwurt. Iɛawed tikkelt nniḍen, ifassen-is d yiḍaren-is ceṭḥen. Isla kan i ṣṣut inna-as-id kcem. Ildi tawwurt ikcem. Akken kan i t-id-iwala Aɛmer inna-as-id kečč iban d mmi Meẓyen ! Meẓyen ur as-yerri ara awal iɣewwes isellem ɣef baba-s. Ttemsalamen ttrun, temlal tasa d way turew. Tarumit tewhem deg wayen tettwali, teḥṣa Aɛmer belli izweǧ zik di tmurt u ɣur-s aqcic maca werǧin i t-yessen Aɛmer, teqqim kan tettweḥḥid amek iwala-t kan iɛqel-it d mmi-s ! Tenna-as …
yettkemmil
Ramdane Lasheb