Inelmaden i d-yewwin akayad n taggara n tesnawit BAC, yetturaǧu ad jerden iman-nsen deg tesdawiyin n tmurt seg uzekka n ttlata 01 n ɣuct alamma d ass n larebɛa 16 ɣuct 2017, i wakken ad bdun aseggas-nsen asdawan 2017-2018. Seg uzekka n ttlata alamma d ass n ssebt 05 ɣuct d talliit ideg ara ad d-yili ujerred amezwaru, ideg ara fernen yisdawanen-agi imaynuten tiskiwin ara ɣren seg tzawara n waggur tuber i d-iteddun. Akka i d-iberreḥ unemhal amatu n uselmed d usileɣ n tneɣlaft n uselmed uffrin d unadi ussnan, Mass Ghouali Noureddine. Yenna-d belli: “ seg umenzu alamma d 5 seg waggur n ɣuct d ajerred amezwaru n yinelmaden i d-yewwin BAC aseggas-agi, d ufran n wayen bɣan ad ḍefren deg tesdawit. Seg wass n lḥed 06 deg waggur-agi i d-iteddun, zemren yinelmaden ad ẓren amek iten-ceggɛen ad ɣren”. Yerna yenna-d: “ tisdawiyin akk n tmurt, llint tiwwura-nsent seg wass-nni n larebɛa iɛeddan, i usegzi d usefhem n yisdawiyen-agi ijdiden, ad ilin yiselmaden d yinelmaden ara ten-iɛiwnen i wakken ad xtiren 6 n teskiwin i wallan lhant. Ttawilat akk iwulmen ttwaheggan i wakken ad iɛeddi ujerred-agi deg tegnatin yelhan”. Dagi deg wakal n lwilaya n Tizi Uzzu, yetturǧu wazal n 10 595 n yinelmaden ara ijerden iman-nsen deg tesdawit n Lmulud At Mɛemmer n Tizi Uzzu, seg uzekka d afella. Ajerred-agi n yinelmaden, ad d-yili deg tesdawit yettwassnen s yisem n Hasnaoua i yellan deg temdint tamaynut n Tizi Uzzu. Afran d wafud igerrzen i yisdawanen-agi.
Ghani Amazigh