TIZI-WEZZU – Aneɣlaf n yemǧahden, Tayeb Zitouni, yessawel i yizzayriyen ass n lǧemɛa di Tassaft Ugemmun, taddart deg ilul ukulunel Amirouche, di tɣiwant Ibudraren akken ad refden tiktiwin n tegrawla taɣelnawt akken ad ḥadren tagmatt ger tarwa n tmurt. Mas Zitouni, yellan di tmesbanit n wesmekti wis 57 n tmettant ukulunel Amirouche Ait Hamouda, yeɣlin deg wegni umennuɣ ass n 29 maɣres 1959 di twilayt n M’sila, akk d wemdakel-is akulunel Si El Houas, yenna-d belli akulunel Amirouche d yemdukkal-is yemmuten ɣef tlelli, werǧin qeblen amḥeṛṣan ad yennal akal d tegmatt ger yizzayriyen. « izumal-agi n wemgaru n weslelli aɣelnaw yellan di yal tama n tmurt yezdin idammen deg wannar umennuɣ, am umedya n ukulunel Si El Houas d Amirouche, yeɣlin jmiɛ deg umennuɣ di M’sila, mmuten akken ad aɣ-d-ǧǧen tamurt teddukkel u terked, d lwaǧeb fell-aɣ nukkni akken ad nḥader fell-as », ikemmel yenna. Aneɣlaf n yemǧahden yemmeslayen akk d yimawlan isallen ɣer yidis n tirza-yagi, yemmeslay ɣef wazal n tɣamsa deg usaḥbiber ɣef tegmatt ger tarwa n tmurt, ayagi s usiwel ɣer tegmatt d uleqqem usirem ger yizzayriyen d ibeddi mgal wid yettnadin ɣef beṭṭu », i yessaḥṛeṣ. Di tirza-yagi di taddart n tasaft ugemmun, aneɣlaf d terbaɛt-is yemmuger-iten Nouredine Ait Hamouda, mmis ukulunel Amirouche, deg wexxam-is.
aps